Azərbaycan və İran arasında iqtisadi sahədə əməkdaşlıq siyasi əlaqələrlə müqayisədə istənilən səviyyədə deyil.

Bunu İranın birinci vitse-prezidenti İshaq Cahangiri bu gün Azərbaycan İqtisadi İnkişaf və Sənaye naziri Şahin Mustafayevlə görüşündə deyib.

Onun sözlərinə görə, İran Azərbaycanla əlaqələrin inkişaf etdirilməsində maraqlıdır: “Son bir ildə iki ölkə arasında siyasi və iqtisadi əməkdaşlıq üzrə sazişlərin icrasının sürətləndirilməsi önəmli addım ola bilər.” O, İran və Azərabycanın həsas bir bölgədə yerləşdiyini vurğulayıb və bildirib ki, iki ölkə İŞİD kimi terror qruplaşmaları ilə mübarizədə əməkdaşlıqlarını artırmalıdır: “İran Azərbaycanla regional və beynəlxalq səviyyədə terrorizmlə mübarizədə əməkdaşlıq etməyə hazırdır”.

Şahin Mustafayev öz növbəsində bildirib ki, Azərbaycan İranda sərmayə yatırmağa hazırdır: “Azərbaycan və İran müşətərk sərmayə yatırmaq və müxtəlif sahələrdə əməkdaşlığın inkişafı üçün geniş potensiala malikdir”.
O əlavə edib ki, İrana qarşı beynəlxalq sanksiyalar ləğv edildikdən sonra iki ölkə arasında ticarət əlaqələri daha da artacaq.