“Azərbaycandan neft alışı dayandırıla bilər”
“Turan” İnformasiya Agentliyinin rəhbəri Mehman Əliyev açıqlamasında Milli Məclisdə müzakirəyə çıxarılan anti-Amerika layihəsini şərh edib. M.Əliyevin sözlərinə görə, ABŞ-la qarşıdurma Azərbaycan üçün fəlakətlə nəticələnə bilər:
“Hesab edirəm ki, baş verənləri Azərbaycan-ABŞ qarşıdurması kimi dəyərləndirmək doğru deyil. Azərbaycan hansı gücə sahibdir ki, ABŞ-la da qarşıdurmaya getsin? Əgər ABŞ Azərbaycanı blokadaya almağa qərar versə, neftin satışı və alışı dayandırılacaq. Bütün münasibətlər dondurulacaq. Buna isə Avropa dövlətləri də qoşulacaq. Onda nə olacaq? Onda ac camaat küçələrə çıxacaq. Yuxarıdan tutmuş aşağıya qədər hər kəs ortaya çıxıb baş verənlərə görə hakimiyyətə etiraznı bildirəcək.
Bir də məmurlarımızın bütün kapitalları xaricdə yerləşdirilib. Məgər bizim məmurlar bu kapitalı itirmək istəyirlərmi? Onlar kapitallarını, hakimiyyətlərini itirmək istəmirlərsə, o zaman niyə kiminləsə baş-başa gəlməlidir? Burda kompromis yolu var və bu kompromis yolu da islahatlardır”.
