Türkiyə Hesablama Palatası Azərbaycanın bu ölkənin qaz operatoru olan “BOTAŞ” şirkətinə 892 milyon türk lirəsi (322 milyon dollar) həcmində qaz verməli olduğunu bəyan edib.
Bu barədə Türkiyənin `Zaman` qəzeti Hesablama Palatasının “BOTAŞ”-da keçirdiyi auditin yekunlarına dair hesabata istinadən bildirir.
Hesabatda qeyd olunur ki, BOTAŞ-ın Azərbaycan və İranla işlədiyi “Al və ya ödə” iş prinsipi qaz operatorunun özünə ciddi ziyan vurur.
Belə ki, “BOTAŞ” şirkəti hələ də almadığı qaza görə İran tərəfində yüz minlərlə dollar ödəyib. Bundan sonra qaz operatoru ödənilən İran qazının daşınması üçün öz bütün infrastrukturlarını işə salıb.
Bundan başqa “BOTAŞ”ın 100 milyonlarla dollar ödədiyi Azərbaycan qazının tədarükü ilə bağlı problemləri yaranıb.
Hesablama palatası qeyd edir ki, əgər “BOTAŞ” 2017-cio ilə qədər ödədiyi qaz həcmlərini ala bilməsə, onda qaz operatoruna 322 milyon dollar zərər dəyə bilər.
