Xəbər verdiyimiz kimi, fevralın 22-dən 23-nə keçən gecə Bakıda qadın sürücü polisin “saxla!” əmrinə tabe olmadığı üçün saxlanılıb. Sürücü maşının qapılarını bağlayaraq tabesizlik göstərdiyi üçün yol polisi onu avtomobillə birlikdə evakuasiya edərək cərimə meydançasına aparıb. Yol polisinin qadın sürücünü maşınla birgə cərimə meydançasına təxliyyə etməsi geniş müzakirələrə səbəb olub. Ekspertlər yol polisinin qadın sürücüyə qarşı tətbiq etdiyi prosesin doğru olmadığı qənaətindədirlər. Ekspert Azər Allahverənov qadın sürücünün evakuasiya xidməti zamanı xəsarət alma ehtimalını da ortaya qoyaraq bu cür təxliyyəni məqsədəuyğun hesab etmir.
Baş Dövlət Yol Polisi İdarəsinin şöbə rəisi Kamran Əliyev isə məsələ ilə bağlı açıqlamasında qadın sürücünün maşınla birgə təxliyyə edilməməsi üçün yol polisi əməkdaşlarının kifayət qədər səy göstərdiklərini vurğulayıb. Şöbə rəisi qanunda içərisində sərnişin olduğu halda avtomobilin təxliyyə edilməsinə qadağa qoyan hansısa maddənin və ya göstərişin olmadığını da deyib.
Qeyd edək ki, avtomobilin ödənilməmiş cəriməsi də olduğundan polis əməkdaşları əmrə tabe olmayan qadın sürücünü süni tıxacla saxlayıblar. Ancaq sürücü maşından düşməməkdə israr etdikdə yol polisi qadını maşını ilə birgə təxliyyə etməyi qərara alıb. Yoxlama zamanı məlum olub ki, Viktoriya Vlasovanın idarə etdiyi avtomobil axtarışdadır. O, avtomobildən düşmədiyindən maşın sürücü ilə birlikdə evakuatora mindirilərək cərimə meydançasına aparılıb. Xanım sürücü cərimə meydançasında da avtomobildən düşməyib. Ancaq yol polisinin verdiyi məlumata görə bir neçə saatdan sonra maşından düşüb və yoxlama zamanı onun sərxoş olduğu müəyyən edilib.
