Aşıq Xanlar Məhərrəmovun yadigarı, tanınmış aşıq Azər Xanlaroğlunun səhhətində yaranan problemlə bağlı sənətçilər xalqa müraciət edib.
Axar.az xəbər verir ki, müraciətdə sənətçilər Aşıq Azərin müalicəsinə yardım xahiş ediblər.
Qeyd edək ki, qara ciyərin serrozu ilə bərabər, nadir xəstəliklərdən olan damarların varikoz genişlənməsindən əziyyət çəkən Azər Xanlaroğlunun kompleks müalicəsi İzraildə mümkündür. Bunun üçün isə müəyyən məbləğdə maliyə vəsaiti tələb olunur. Artıq bir aya yaxındır ki, Aşıq Azərin müalicəsinə yardım məqsədilə bankda hesab açılıb. Amma bu müddətdə ərzində tələb olunandan xeyli az məbləğ toplanıb. Azərin isə vəziyyəti günü-gündən ağırlaşır. Onun müalicəsinə yardım məqsədilə dostları xeyriyyə konserti keçirmək qərarına gəlıb.
Ölkəmizin tanınmış müğənniləri, xanəndələri, aşıqlar və estrada təmsilçiləri martın 5-də saat 17:00-da Rəşid Behbudov adına Mahnı Teatrında bir araya gələrək Aşıq Azər üçün xeyriyyə konserti verəcəklər.
