Tahir Süleyman: “Kimlərinsə iki il əvvəl keçirilmiş bayram tədbirindən videonu yenidən sayta qoyması və bunu PKK ilə bağlaması etik deyil”
Bəzi saytlarda və sosial şəbəkələrdə “Bakıda PKK Novruz bayramı keçirdi” başlığı ilə xəbərlər yayılıb. Bu başlıqlarla verilən xəbərləri isə Novruz şənliyindən videogörüntü müşayiət edib. Azərbaycan Kürdləri İctimai Birliyinin rəhbəri, Azərbaycanda kürd dilində çap edilən “Diplomat” qəzetinin baş redaktoru Tahir Süleyman “Yeni Müsavat”a bu barədə açıqlama verərək bildirib ki, yayılan video əslində 2014-cü ildə Azərbaycan Kürdləri İctimai Birliyinin təşkil etdiyi Novruz bayramı şənliyidir.
2016-cı ildə belə bir Novruz şənliyi keçirilməyib: “Bizim 2014-cü ildə təşkil etdiyimiz Novruz bayramı şənliyi barədə xəbərlər, videomaterial o zaman ANS telekanalında efirə verilib. ”Yeni Müsavat” qəzetində və digər bir neçə media orqanında dərc olunub. Biz bayram şənliyi keçirəndə gizli keçirmirik. 2014-cü ildə keçirdiyimiz və bayram şənliyinə Azərbaycanın Mədəniyyət Nazirliyi və digər rəsmi strukturlarını da dəvət etmişdik. Eyni zamanda Azərbaycanda yaşayan digər millətlərin təmsilçilərini də bayram şənliyinə çağırmışdıq.
İndi kimlərinsə iki il əvvəl keçirilmiş bayram şənliyindən olan videonu yenidən sayta qoyması və üstəlik də “PKK Bakıda bayram şənliyi keçirdi” başlığı ilə təqdim etməsi, hörmətli general-polkovnik Bəylər Əyyubovun da adının bayram şənliyi ilə əlaqələndirilməsi nə jurnalistika prinsiplərinə, nə də etikaya uyğundur. Hazırda mənim başım yenicə dünyasını dəyişmiş əmim oğlunun yas mərasiminə qatılıb.
Bir qədər sonra mən həmin saytların rəhbərliyinin kim olduğunu araşdırıb onlara belə təxribatlarına son qoymaları ilə bağlı xəbərdarlıq edəcəyəm. Videosu yayılan 2014-cü ildə keçirdiyimiz Novruz bayramı şənliyini PKK yox, Azərbaycan Kürdləri İctimai Birliyi təşkil edib. Yüksək səviyyədə keçirilmiş və hər kəsə açıq olmuş bayram törəni haqda ictimaiyyətə məlumat verilmişdi. İndi kimlərsə ara qarışdırmaq istəyinə düşübsə, biz onları böhtanlarına görə məhkəməyə verə bilərik. Burada heç bir problem yoxdur. Bizim heç bir gözükölgəliliyimiz yoxdur ki, çəkinək”.
