Argentinanın sabiq ictimai işlər naziri Xose Lopes monastırın ərazisində 8,5 milyon dolları basdırarkən polis tərəfindən saxlanılıb.
Rusiya KİV-i xəbər verir ki, Buenos-Ayresin ətrafında yerləşən monastıra kənar şəxsin daxil olması haqda anonim telefon zəngindən sonra polis əməkdaşları əraziyə baxış keçiriblər.
Eks-nazir küllü miqdarda pulu torpağa basdırarkən yaxalanıb. Lakin Lopes özünü itirməyib və polis əməkdaşlarına rüşvət verməyə cəhd edib. Bunun alınmadığını görən sabiq məmur keşişlərə müraciət edərək pulu monastıra ianə vermək məqsədilə əraziyə gəldiyini, lakin polisin buna imkan vermədiyini və pulları ondan oğurlamaq istədiyini bildirib.
Məlumata görə, Lopes, təxminən 8,5 milyon dollar məbləğində olan və 160 bağlamaya bükülmüş ABŞ dolları, avro, Yaponiya iyeni və Qətər rialı kimi müxtəlif valyutada olan pulları monastırın ərazisində torpağa basdıraraq, gizlətmək istəyib.
