Dünya birjalarında neft bahalaşaraq, son günlərin ən yüksək həddinə-50,41 dollara çatıb. ICE London qitələrarası birjasında Brent markalı neftin qiyməti 50,41 dollar olub. “Bloomberg”in xəbərinə görə, Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI neftinin qiyməti 1 barelə görə 49,18 dollar təşkil edib. Qeyd edək ki, dünən hərracların nəticələrinə görə, Brent və WTI markalı neftin bir barelinin qiyməti müvafiq olaraq 49,65 və 48,52 dollar təşkil etmişdi.
Neftin bahalaşması xəbəri Azərbaycanda da şad xəbər kimi qarşılanıb. Qara qızılın bir dollar belə bahalaşması xəbəri iqtisadiyyatı neftin asılı olan ölkələrdən biri kimi Azərbaycana da müsbət təsir edir. Lakin ekspertlər bu artımın elə də ciddi bir tendensiya olmadığı qənaətindədirlər.
Neft Araşdırmalar Mərkəzinin rəhbəri İlham Şaban neftin bahalaşmasına siyasi amillərdin təsir etdiyini və bunun üçün fundamental iqtisadi əsasların olmadığını bildirdi: “Həftə başlayandan neftin qiyməti 50 dollardan yuxarıdır. Ondan öncə isə 50 dolların altında idi. Yəni bazarda son bir həftənin tendensiyasını götürsək, böyük bir dəyişiklik yoxdur. Yəni neftin qiyməti 50 dollar ətrafında dövr edir. Qiymət müəyyən dərəcədə qalxır, sonra enir. İndi ”xoş xəbərlər” yayılır, bu “xoş xəbərlər” ayın 23-də Britaniyanın Avropa Birliyində qalıb qalmaması ilə bağlı keçirilən referendumdan asılı olacaq. Bu hadisə bazara qızdırıcı təsir edir. Cümə gününə kimi bu təsir qüvvədə olacaq. Sabah axşam ABŞ-da neft ehtiyatları ilə bağlı növbəti hesabat açıqlanacaq. O hesabat, ABŞ-da neft ehtiyatlarının azalması və ya artması bazarda neft qiymətlərinə elə də böyük təsir etməyəcək, lakin bundan gələn xəbərlər bazara informativ təsir göstərəcək. Bunlar siyasi amillərdir. Ancaq bazarda fundamental olaraq elə bir dəyişiklik yoxdur”.
İqtisadçının sözlərinə görə, neftin bir sent bahalaşması belə Azərbaycanın xeyrinədir: “Neftin bahalaşması Azərbaycana daxil olan neft gəlirlərinin az da olsa artmasına səbəb olur. Neft bir dollar qalxıb, bu isə gündəlik gəlirlərdən 700 min dollar əlavə vəsait deməkdir”.
