Suriya hərbçiləri qırıcıları və hərbi texnikanı Şayrat bazasına qaytarmağa başlayıblar.
NBS Nyus bu məlumatı ABŞ Müdafiə Nazirliyindəki 3 mənbəyə istinadla yayıb. Bildirilir ki, Suriya rejim qüvvələri bazadakı dağılan infrastrukturu bərpa ediblər və artıq Su-22 və MiQ-23 qırıcılarını aviabazaya yerləşdiriblər.
“Tezliklə onlar Şayratdan uçmağa başlayacaqlar”, – mənbə qeyd edib.
Suriya müxalifəti 4 apreldə İdlibin Xan-Şeyxun şəhərinə kimyəvi bomba atılması nəticəsində 80 dinc sakinin öldüyünü və 200 nəfərin yaralandığını bildirmişdi (bəzi mənbələrə görə, 100-dən artıq adam ölmüş, 500 nəfərsə yaralanmışdı). Günahkar olaraq Suriya silahlı qüvvələri göstərilmişdi. Bəşər Əsəd qüvvələri isə bu ittihamı rədd etmişdi.
ABŞ Bəşər Əsədin bu hücumuna cavab olaraq 7 apreldə Şayrat bazasına raket hücumu həyata keçirdi. Pentaqon bazanı 59 raket zərbəsi ilə darmadağın etdiyini açıqladı.
