Rusiya Prezidenti Vladimir Putin Krımı, Qazaxıstanın şimal bölgələrini və Kalininqradı hələ 1994-cü 
ildən – Sankt Peterburq meri Anatoli Sobçakın müavini işlədiyi dövrlərdən anneksiya etməyi arzulayırmış.
Bu barədə Center.asia portalında müxtəlif mənbələrə istinadla xüsusi məqalə dərc edilib. Qeyd edilib ki, Sankt-Peterburq şəhərində 1994-cü ildə Şərqlə Qərbin Rusiyaya münasibəti barədə geniş konfrans keçirilib. Tarixçi, jurnalist və digər elm sahələrinin nümayəndələrinin yer aldığı siyahıda Putinin adı və doğum tarixi konfedensial saxlanılıb. Həmin tədbir protokolunda göstərilib ki, kəşfiyyatçı kimi Putin bir müddət susmağa üstünlük versə də, sonra söz alıb və aşağıdakı fikirləri deyib:
“Keçmiş Sovetlər Birliyi ərazisində yaşayan rusdilli əhalinin taleyinə toxunaraq demək istəyirəm ki, onlar SSRİ rəhbərliyinin qurbanı olublar. Unutmayın ki, Avropa və dünyada sabitliyin bərqərar olması üçün Rusiya könüllü şəkildə SSRİ respublikalarının xeyrinə böyük ərazilərdən vaz keçməli oldu. Təbii ki, bura Rusiyanın tarixi torpaqları da daxildir. Söhbət Krım, Kalininqrad və Qazaxıstanın şimal bölgələrindən gedir. SSRİ-nin dağılması nəticəsində 25 milyon rus Rusiyanın hazırkı sərhədlərindən kənarda qalmalı oldu. Biz heç vaxt onların taleyinə biganə qala bilmərik. Bu, həm də Avropanın təhlükəsizliyinə xidmət edərdi”.
Beləliklə, Putin Krımla bağlı fikirlərini 2014-cü ilin fevralı 28-də reallaşdıra bildi. Onun növbəti addımları maraq doğurmaya bilməz.
