Sentyabrın 17-18-də Moldovanın paytaxtı Kişinyov şəhərində “Dövlətlərin ərazi bütövlüyü və insan
hüquqlarının müdafiəsinin təmin olunması” mövzusunda beynəlxalq konfrans keçiriləcək.
Axar.az-a açıqlama verən Prezident yanında Dövlət İdarəçilik Akademiyasının Siyasi Araşdırmalar İnistitutunun direktoru Elman Nəsirovun sözlərinə görə, konfrans Moldova Respublikasının İnsan Hüquqları üzrə Müvəkkili Aureli Qriqoriunun təşəbbüsü ilə keçiriləcək:
“Paytaxt Kişinyovda keçiriləcək konfransda buraya qatılacaq dövlətlərin ərazi bütövlüyü və insan hüquqlarının müdafiəsi məsələlərinə toxunulacaq. Eyni zamanda, Azərbaycan əsas prioritet mövzu olaraq Dağlıq Qarabağ məsələsini, BMT-nin dörd qətnaməsinin indiyənədək icra olunmaması və işğal olunmuş ərazilərimizin boşaldılmaması, hüquqları pozulmuş yüzminlərlə soydaşımızın müdafiəsi məsələsini beynəlxalq diqqətə çatdıracaq”.
Xatırladaq ki, konfransda Rumıniya, Türkiyə, Azərbaycan, Macarıstan, Latviya, Gürcüstan, Ukrayna və digər ölkələrin ombudsmanları, Avropa Parlamentinin deputatları, politoloqlar, diplomatlar, alimlər, QHT təmsilçiləri və b. iştirak edəcəklər.
