Avropa Mərkəzi Bankı (ECB) bu gün keçirtdiyi növbəti iclasında uçot dərəcəsini 0,05%-dən 0%-ə endirib. Qeyd edək ki, analitiklərin proqnozu uçot dərəcəsinin sabit qalması istiqamətində olub.
Bundan əlavə, ECB depozitlər üzrə faiz dərəcəsini proqnozlara uyğun olaraq -0,3%-dən -0,4%-ə endirib, monetar ekspansiyanın həcmini isə 33% artıraraq 60 mlrd. avrodan 80 mlrd. avroya yüksəldib. Burada ECB bank istiqrazlarından başqa əlavə olaraq şirkət isatiqrazlarını da geri alacağını bildirib. Bank borc faizini də 0,05 bənd azaldaraq 0,3%-dən 0,25%-dək azaldıb.
Bu qərarlardan sonra sonra qlobal valyuta bazarlarında avro sürətlə dəyərini itirməyə başlayıb, dollara qarşı məzənnəsi qısa müddət ərzində 1,4% azalaraq 1,0980 USD/EUR-dan 1,0840 USD/EUR-a enib.
Hazırda qlobal maliyyə bazarları ECB sədri Mario Draginin mətbuat konfransını gözləyir. Mətbuat konfransında Avrozonada iqtisadi gözləntilərin səsləndiriləcəyi ehtimal edilir.
Qeyd edək ki, ECB qərarları investorların proqnozlarından daha sərt olub. “Report”un analitik qrupu hesab edir ki, USD/EUR məzənnəsi 1,08 səviyyəsində tarazlıq nöqtəsini tapmasa 1,06 səviyyəsinə qədər geriləyə bilər.
