İngiltərənin “Guardian” qəzeti ABŞ-ın İŞİD siyasətini tənqid atəşinə tutub.
Avropa.info xəbər verir ki, qəzeti jurnalisti Yan Blək yazır ki, İŞİD-in Palmira və Ramadi zəfəri ABŞ-ın siyasi strategiyasındakı boşluğu ortaya çıxarıb.
“Guardian” son hadisələrdən belə nəticə çıxarır ki, müharibənin uzaqdan idarə edilməsi uğursuz siyasətdir və Vaşinqton bu faktla üz-üzə qalıb. Yan Blək:
“İŞİD-in Palmira və Ramadi zəfəri ABŞ rəhbərliyində Suriya və İraqda döyüşən koalisiya gücləri üçün ağır nəticələr verən zərbə oldu. Bu zəfərlər həm səhv, həm də könülsüz həyata keçirilən strategiyanın qüsurlarını ortaya qoydu. Son bir-iki həftəyə qədər Vaşinqton, London və ərəb paytaxtlarında ümumi fikir bu idi ki, İŞİD geriləyir, pul, silah, təchizat problemləri yaşayır. Dəyişən vəziyyət bu paytaxtları yenidən fikirləşməyə məcbur edir”.
Qəzetin yazdığına görə, adının açıqlanmasını istəməyən ABŞ məmuru Obama hakimiyyətinin məsələni yenidən müzakirə etdiyini deyir.
Sabiq ABŞ müdafiə naziri Robert Geyts isə açıq şəkildə etiraf edib: “Reallıqda heç bir strategiyamız yoxdur. Məsələyə ötəri yanaşırıq”.
Son həftənin regional əhəmiyyətli xəbərlərindən biri də Səudiyyə Ərəbistanın keçmiş rəqibləri Türkiyə və Qətərlə bir yerdə İŞİD-ə qarşı suriyalı qruplardan ibarət koalisiya yaratması olub.
Əsəd rejimi ilə deyil, İŞİD-lə mübarizə aparacaq suriyalı silahlı qrupların təlimi bir neçə həftə əvvəl başlasa da, proses çox zəif gedir.
“Guardian”a görə Əsəd devrilməyənə qədər İŞİD məğlub olmayacaq. Ancaq Suriya rejimi zəifləmiş görünsə də, rejimin gedəcəyi son tarix hələ ki, görünmür.
