Kişilər ayrıldıqdan sonra keçmiş həyat yoldaşlarını və uşaqlarını küçədə qoyur.
Elchi.az xəbər verir ki, bu sözləri Şərq.az-a Milli Məclisin deputatı Jalə Əliyevanın qadın sığınacaqlarının yaradılması barədə təklifinə münasibət bildirən “Gündəlik Teleqraf” Media Holdinqinin rəhbəri, Qadın Konsensus Mərkəzi İctimai Birliyinin sədri Aynur Camalqızı söyləyib.
Onun sözlərinə görə, Azərbaycanda qadın zorakılığı dəhşətli səviyyədə olmasa da, xanım deputatın bu fikri dəstəklənməli və daha səmərəli addımlar atılmalıdır:
“Araşdırmalarıma əsaslanaraq deyə bilərəm ki, bu problem hələ də qalmaqdadır. Ötən günlərdə Qəbələdə 3 uşaq anasının qətlə yetirilməsi faktı da mediada bu fonda yayıldı. Belə mənfi halları nəzərə alıb, dövlət tərəfindən qadınlara dəstəyin artırılması çox yaxşı olardı. İlk növbədə bölgələrdə problemin həlli üçün ölçü götürülməlidir. Çünki bölgələrdə bu hadisələr tez-tez baş verir. Qızların erkən yaşda ərə verilməsi və ya qaçırılma faktları müvafiq icra strukturlarının gözü qarşısında baş verir. Əksər vaxtlar bunu mentalitetlə əlaqələndirib, göz yumurlar. Ona görə də bu sahədəki qanunları sərtləşdirmək lazımdır”.
A.Camalqızı bildirib ki, qadınlar boşandıqdan sonra övladları ilə birlikdə küçədə qalır:
“Qadın ailə qurur, bir neçə övlad sahibi olur, ayrıldıqda isə sığınacaqsız qalır. Qanunvericiliyə əsasən, evlilik müddətində ortaq əmlak alınmayıbsa, boşanma baş verdikdə kişi rahat şəkildə o qadını küçədə qoya bilir. Həmin qadını valideynləri qəbul etmirsə və özünün təhsili, işi yoxdursa, artıq onun üçün yol qalmır. Müəyyən olunan alimentin məbləği də uşağın gündəlik tələbatı üçün kifayət etmir. 109 manat aylıq aliment ayrılır və bu, Azərbaycan reallığında çox az məbləğdir. Bu səbəbdən qanunvericilikdəki normalara yenidən baxmaq və qadınlara daha üstün hüquqlar tanımaq lazımdır. Müəyyən olunmuş qanunlardan sui-istifadə halları kifayət qədər çoxdur. Məsələn, ailə qurmazdan öncə kişinin adına olan əmlakları çıxarıb, valideynlərin və ya qohumların adına keçirirlər. Nikah müddətində isə əmlak alınmır ki, boşanma zamanı bölünmək üçün heç nə olmasın. Bu cür məsələlərlə üzləşməmək üçün yaxşısı budur ki, evləndikdə əmlak müqaviləsi imzalansın. Bütün bunları nəzərə alaraq, J.Əliyevanın təklifinə laqeyd yanaşılmayacağına və dövlətin bu sahədə tədbirləri artıracağına ümid edirəm”.
Qeyd edək ki, Milli Məclisidə 2017-ci ilin büdcə müzakirələri zamanı xanım deputat Jalə Əliyeva zorakılığa məruz qalan qadınlar üçün sığınacaqların yaradılmasını təklif edib.
