Çərşənbə axşamı Rusiya prezidenti Vladimir Putinin qoşunlarının müharibədə uğursuzluğa düçar olduğu haqqında bəyanatından sonra Ağ Ev Ukraynaya dəstəyi artırmağı vəd edib.
“Mən deyərdim ki, ruslar sadəcə olaraq rədd olub getsəydilər və qoşunlarını ölkədən çıxarsaydılar, Ukraynada onlar üçün hər şey daha asan ola bilərdi”, deyə Ağ Evin Milli Təhlükəsizlik Şurasının rəsmi nümayəndəsi Con Kirbi telekonfrans zamanı jurnalistlərə bildirib.
Həmin gün Putin öz çıxışında Rusiya qüvvələrinin Ukraynanın bəzi hissələrində çətinlik çəkdiklərini bildirib, bu da Ukrayna qoşunlarının müqavimətinin kiçik etirafıdır.
Kirbi əlavə edib ki, ABŞ Ukraynaya maliyyə yardımı və təhlükəsizliyin təmin edilməsində kömək göstərməyə davam edir.
Turan-ın Vaşinqtonun Ukraynaya Patriot kompleksləri tədarük etmək planlarına Rusiyanın reaksiyası haqqında sualına cavabda Kirbi deyib ki, Rusiya “Amerikanın Ukraynaya yardımı məsələsində şərtləri diktə etmək hüququna malik deyil”.
O əlavə edib ki, ABŞ Ukraynaya özünü müdafiə etmək imkanı yaratmaq üçün onunla işləməyə davam edəcək.
