Yanvarda kabinetdə gözlənilən dəyişiklik maraqla izlənilir, yenilərin kim olacağı da müzakirə olunmaqdadır
Musavat.com Türkiyə mətbuatına istinadən bildirir ki, Türkiyədə hakim partiya olan AKP kabinetə seçkidən əvvəl yenidən “diqqət yetiriləcək” və bir neçə tanınmış şəxs kabinetdən kənarda qalacaq.
Yanvarda ediləcək dəyişikliklə AKP-də “abilər” olaraq adlandırılan dörd nəfərin kabinetdən kənarlaşdırılacağı bildirilir. Belə ki, onlar parlamentə üçüncü dəfə namizəd ola bilməzlər.
Onlar Bülent Arınç, Taner Yıldız, Faruk Çelik və Ömər Poladdır.
Həmçinin üç dəfə seçilən nazirlərdən bəzilərinin də kabinetdən xaricdə qalacağı bildirilir. Baş nazir Əhməd Davudoğlunun başçılıq etdiyi 62-ci hökumətdə dəyişiklik ediləcəyi xəbərləri ciddi müzakirələrə yol açıb. Belə ki, tezliklə daxili işlər naziri Efkan Ala, ədliyyə naziri Bəkir Bozdağ və nəqliyyat naziri Lütfü Elvanın vəzifələrindən istefa etməsi lazımdır. Üç nazirin yerinə baş nazir Davudoğlu Konstitusiyaya əsaslanıb yeni namizədlər seçməlidir.
Baş nazirin müavini Əli Babacanın, maliyyə naziri Məmməd Şimşəkin, inkişaf naziri Cevdet Yılmazın yerlərini qoruyacağı bildirilir. Bu baxımdan AKP-nin kabinetə yeni dəvət edəcək şəxslərin kim olacağı maraq doğurur.
