Almaniyada son bir gündə koronavirusdan daha 57 nəfər ölüb.
“Report” RİA “Novosti”yə istinadən xəbər verir ki, bu barədə AFR-in Səhiyyə Nazirliyinin strukturuna daxil olan və ölkədə COVID-19 xəstəliyi ilə bağlı statistika aparan Robert Kox İnstitutu bildirib.
İnstitutun məlumatına görə, epidemiyanın başlanğıcından ölkədə virusa ümumilikdə 176 752 yoluxma qeydə alınıb, COVID-19 diaqnozu qoyulmuş 8 147 insan ölüb. Bununla yanaşı, virusa yoluxmuş 158 min nəfər sağalıb.
Federasiya ərazisində təhlükəli virusa yoluxma hallarının ən böyük sayı Bavariyada qeydə alınıb. Burada 45 929nəfər COVID-19 xəstəsi kimi qeydiyyata alınıb. Şimal Reyn-Vestfaliyada 36 912 nəfər, Baden-Vürtemberqdə 34 175 insan virusa yoluxub. Berlində koronavirusa 6 555 yoluxma aşkarlanıb.
Qeyd edək ki, ötən gün Almaniyada koronavirusdan 83 nəfər ölüb, 797 yeni yoluxma qeydə alınıb.
Koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus 213 ölkə və bölgədə qeydə alınıb.
Ümumdünya Səhiyyə Təşkilatı (ÜST) fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.
