Cənubi Koreya mətbuatında yer alan xəbərə görə, Koreya Hava Yolları ilə uçan sərnişinlərdən önümüzdəki həftələrdə təyyarəyə minməzdən əvvəl çəkilərinin ölçülməsi istəniləcək. Qərar Seuldakı tənzimləyicilərə təyyarə çəkisi və balans standartlarını yeniləməkdə kömək etmək üçün qəbul edilib.
Elchi.az xəbər verir ki, avqustun 28-dən sentyabrın 6-dək Seulun Gimpo hava limanında daxili sərnişinlər üçün, 8-19 sentyabr tarixlərində isə beynəlxalq sərnişinlər üçün İnçon hava limanında tərəzi stansiyaları quraşdırılacaq.
Aviaşirkət hər bir sərnişinin çəkisini və əl baqajını qeyd edəcək və bu qeydlər ölkənin Torpaq, İnfrastruktur və Nəqliyyat Nazirliyinə göndəriləcək.
Nazirlik daha sonra bu məlumatlardan tipik bir sərnişinin orta çəkisini hesablamaq üçün istifadə edəcək və bu məlumatlar oturacaq yerləri və təyyarənin nə qədər əlavə yanacaq daşımalı olduğu qaydaları hazırlamaq üçün istifadə olunacaq.
Aviaşirkət işçiləri vurğuladılar ki, artıq çəkili sərnişinlər daha çox pul ödəməli olmayacaq və toplanan bütün məlumatlar anonimləşdiriləcək.
Şayəstə Hüseynova
