“Biz bilirik ki, hələ yara təzədir, bəzi açıq suallar var, ancaq yenə qeyd edirəm ki, mən ötən illə müqayisədə daha optimistəm. Çünki düzgün istiqamətdə atılan addımları görürəm”.
Elchi.az-ın xəbərinə görə, bunu Ermənistanda səfərdə olan Avstriyanın xarici işlər naziri Aleksandr Şallenberq erməni həmkarı ilə birgə mətbuat konfransında bildirib.
O deyib ki, Avstriya və Aİ bu istiqamətdə daha çox kömək etmək istəyir. Nazir diqqətə çatdırıb ki, lakin bunun üçün tərəflər onların kömək etməsində maraqlı olmalıdır.
“Lakin bir şeyi açıq qeyd edirəm ki, beynəlxalq ictimaiyyət tərəflərin siyasi iradəsini əvəz etməyəcək və edə bilməz. Bunun üçün Bakı və İrəvanın, azərbaycanlılarla ermənilərin bu yolu getməsinə ehtiyac var”, – XİN başçısı vurğulayıb.
O, Ermənistanın Antalya Diplomatiya Forumuna dəvət edilməsinə də münasibət bildirib: “Bilmirəm biz Antalyada görüşəcəyik ya yox, ancaq mən düşünürəm ki, Ermənistanın Antalya Diplomatiya Forumuna dəvəti Türkiyə tərəfindən edilmiş yaxşı bir jestdir”.
