Azərbaycanda nümunəvi qəbiristanlıqların salınmasını nəzərdə tutan qanun layihəsinin hazırlanması təxirə salınıb.
Modern.az-ın əldə etdiyi məlumata görə, hazırda qəbiristanlıqlarla bağlı yeni qanun layihəsi ilə bağlı nə Milli Məclisin İctimai birliklər və dini qurumlar, nə də parlamentin müvafiq qanunvericilik şöbəsində iş aparılır. Hətta yeni qanun layihəsinin “Milli Məclisin 2018-ci il qanunvericilik işlər planı”na belə daxil edilməyəcəyi bildirilir.
Modern.az-ın əməkdaşı məsələni dəqiqləşdirmək üçün Milli Məclisin İctimai birliklər və dini qurumlar komitəsinin üzvü Fazil Mustafa ilə əlqə saxlayıb.
Deputat Azərbaycanda nümunəvi qəbiristanlıqların salınmasını, vahid ölçüdə qəbirüstü abidələrin qoyulmasını nəzərdə tutan sənədin hazırlanması ilə bağlı məsələnin komitədə müzakirə olunmadığını bildirib.
“Bu, sadəcə bir ideya kimi verilib və mətbuatda səsləndirilib. Amma belə bir qanun layihəsi Milli Məclisdə hələ ki yoxdur. Bu il üçün də qanun layihəsi “Milli Məclisin qanunvericilik işlər planı”na daxil edilməyib”.
Qeyd edək ki, məsələ əvvəllər bir neçə dəfə Milli Məclisin iclasında gündəmə gətirilmiş və nümunəvi qəbiristanlıqlara dair sənədin hazırlanacağı bildirilmişdi.
