“27 Sentyabr 2020-ci ildə başlayıb 44 gün ərzində Azərbaycanın zəfəri ilə bitən II Qarabağ savaşından sonra həm Azərbaycan, həm də dünya baxımından yeni dövrün əsası qoyulmuş oldu”.
Elchi.az xəbər verir ki, bu fikirləri politoloq Samir Hümbətov FB hesabında bildirib.
Onun sözlərinə görə, 10 Noyabr 2020-ci ildən etibarən Azərbaycanın xarici siyasət strategiyada yeni konsepsiyaya keçməsi getdikcə öz məntiqi nəticəsini verməkdədir:
“Azərbaycan bir tərəfdə Ermənistanı sülhə məcbur edib Zəngəzur dəhlizini açmağı hədəfləyir, digər tərəfdə Avropa ilə enerji sahəsində əməkdaşlığı dərinləşdirir. Bununla paralel olaraq Naxçıvana keçid üçün İranla anlaşma imzalayır, digər tərəfdən Ukrayna müharibəsindən öncə Rusiya ilə müttəfiqlik müqaviləsi imzalayır. Həmçinin Özbəkistanda Şanxay Əməkdaşlıq Təşkilatının dialoq ortağı olaraq sammitə önəmli tərəf kimi qatılır, digər tərəfdən Avropa Siyasi Birliyinin Praqada keçrilən ilk sammitinə dəvət alır və orada 30 ildən sonra Avropanın gözü önündə Ermənistana Azərbaycanın ərazisini tanıtmağı bacarır.
Nəhayət, bütün türkdilli dövlətlərlə müttəfiqlik haqqında sənəd imzalayır, digər tərəfdən Asiyada təhlükəsizlik və əməkdaşlıq platformasında aktiv şəkildə iştirak edir.
O zaman ortaya sual çıxır; Azərbaycanın seçdiyi xarici siyasi strateji xətt nədən ibarətdir?
Əlbəttə ki, çoxşaxəli xarici siyasət strategiyasından. Yəni Azərbaycan ən çətin vəziyyətdə belə dünyanın mövcud şərtlərini nəzərə almaqla yanaşı, həm də balanslı xarici siyasət qurmaqla, öz təhlükəsizliyini təmin etməklə region və dünya dövlətləri ilə aktiv xarici siyasət yürüdür. Bunun üçün isə ən başlıca şərt siyasəti və onun şərtlərini bilməkdən asılıdır.
Hesab edirəm ki, Azərbaycan prezidenti cənab İlham Əliyevin uzun dövlətçilik təcrübəsi və dərin siyasi savadı imkan verir ki, hətta kiçik dövlət olmağımıza baxmayaraq əlimizdə olan maddi və mənəvi resurslarımızdan səmərəli şəkildə faydalanmaqla dünyanın nəhəng dövlətləri ilə bir masada nüfuz mübarizəsi apara bilək”.
Yeganə
