Kamran Nəsirov: “Baş verənlərin sahə rəisinə nə dəxli var?”“Yeni Müsavat” qəzetinin 13 yanvar tarixli sayında “Azəristiliktəchizat”da nələr baş verir” başlıqlı yazı getmişdi. Və həmin yazıda Bakının Yasamal rayonunda minlərlə mənzilin istiliksiz qalmasının pərdəarxası məqamlarına aydınlıq gətirilmişdi. Yazıda 8 saylı İstilik Sistemlərinin İstismar Sahəsinin qazanxanasında cinayətə bərabər olan təxribatın təfərrüatları göstərilmişdi. Və qazanxanaya məsul olan Arif adlı şəxsin işdən çıxarıldığına görə belə təxribata əl atdığı bildirilirdi.
Bununla bağlı redaksiyamıza müraciət edən 8 saylı İstilik Sistemlərinin İstismar Sahəsinin rəisi Kamran Nəsirov yayılan xəbərlərin reallıqdan uzaq olduğunu bildirib: “Mətbuat işçilərinə böyük hörmətim var. 1984-cü ildən rəis işləyirəm. Amma gözləməzdim ki, mətbuat araşdırma aparmadan belə yazı verər. İmkan varsa, gəlib yerində araşdırın. Şəxsiyyətimə qarşı bu cür yazıları gözləməzdim. Ailələri istiliklə təmin etmək mənim vəzifə borcumdur. Bu, tamam başqa məsələdir. Bütün bu baş verənlərin sahə rəisinə nə dəxli var? Bütün bunlar mənə qarşı bir təxribatdır. Bu işləyən bir insanın qol-qanadını sındırmaqdır. Yaşayış evləri tikilib. Bütün xətlər binaların altında qalıb. Bu, mənimmi günahımdır? Yaranan problemlərin tezliklə aradan qaldırılması üçün əlimizdən gələni edirik. Arifin nə səbəblə işdən kənarlaşdırılması məlum deyil. Günahının olub-olmamasını da deyə bilmərəm. O, müqəddəs vəzifə borcunu yerinə yetirir ki, insanları istiliklə təmin etsin. Heç kəs İşdən çıxarıldığı deyilən kimi, dərhal azad olunmur ki… Arif bu gün də bizə kömək edir. Arifin gühahı o olub ki, texniki şərtlərə əməl etməyib. Başqa bir səhvi olmayıb. Heç kəsi aldatmayıb. Yazırlar ki, Arif cinayətə bərabər təxribat edib. O, belə şey etməz. Bu insan həyatını məhv etməkdir. Xahiş edirəm ki, bu barədə araşdırma aparılsın”.
Cavanşir ABBASLI
