Bu gün Bakı Ağır Cinayətlər Məhkəməsində dələduzluqda təqsirləndirilən Elgün İmranlının cinayət işi üzrə məhkəmə prosesi başa çatıb.
Elchi.az Trend-ə istinadən bildirir ki, hakim Əfqan Hacıyevin sədrliyi ilə keçirilən prosesdə təqsirləndirilən şəxsə hökm oxunub.
Məhkəmənin hökmü ilə o, 9 il azadlıqdan məhrum edilib.
İttihama əsasən, “Azərsu” Açıq Səhmdar Cəmiyyətinin sabiq əməkdaşı olan E.İmranlı Rauf İbrahimov, Həsən İbrahimov, Əbülfəz İbrahimov və Elçin Məmmədova tenderdə qalib gələcəyi vədi verərək onların etibarından sui-istifadə edib və ümumilikdə 206 min manat pulu dələduzluq yolu ilə ələ keçirib.
Zərərçəkmişlərin şikayəti əsasında saxlanılan E.İmranlı barəsində Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham irəli sürülüb. O, hazırlıq iclası zamanı məhkəmə zalında həbs olunub.
