İyunun 2-də Avropa Oyunlarının məşəli Bakıya qayıdır və bu münasibətlə rəsmi “Məşəl Bakıda” proqramı çərçivəsində nəzərdə tutulan tədbirlərin açıqlandığı mətbuat konfransı keçirilib.
Konfransda Azərbaycanın gənclər və idman naziri və “Bakı 2015”-in İcraçı direktoru Azad Rəhimov da çıxış edib. A.Rəhimov çıxışının sonunda jurnalistlərin suallarını cavablandırıb.
Jurnalistlər tərəfindən verilən suallar arasında ən diqqət çəkəni bu yaxınlarda mediada yayılmış olan “İlhamə Quliyeva məşəl daşıyacaq” xəbəri ilə bağlı idi.
“Azad müəllim, belə bir xəbər yayılıb. Bunu “BEGOC” nə təsdiq etdi, nə də təkzib… Bununla bağlı siz nə deyə bilərsiniz” sualına Azad Rəhimov belə cavab verdi: “Çox təəccüblənirəm ki, niyə xalq artisti İlhamə Quliyeva ətrafında müzakirələr aparılır? İlhamə xanım çox sevimli müğənnidir. O, 150 məşəl daşıyandan biri olacaq. O, qaça bilməsə də, hərəkət edəcək. İ.Quliyeva məşəli 10-20-30 metr daşıya bilər. Mən şəxsən buna çox şadam”.
Nazirin sözlərinə görə, Avropa Oyunlarının məşəlini daşıyanlar arasında müxtəlif sahələrdən olan tanınmış şəxslər var: “Məşəli sırf idmançıların daşıması barədə ideyamız yox idi. Biz rayonlara müraciət etdik. Oradan tanınmış, ictimaiyyəti əhatə edən insanların adları təqdim olunub. Siyahılarda təkcə idmançılar yox, digər ictimai şəxslərin də adları var. Onlar Azərbaycanı dünyaya tanıtdıran insanlardır. Xalq artisti Əlibaba Məmmədov isə dedi ki, məşəli daşımaq çox çətindir. O, səhhətinə görə bu prosesdə iştirak edə bilmir”.
Amma İ.Quliyevanın məşəl daşıması məsələsi görünür ki, hələ çox su aparacaq. Belə ki, məsələyə münasibət bildirən xalq artisti Flora Kərimova azvision-a sərt açıqlama verib: “Kimsə bizi bütün dünyaya güldürmək istəyir. Görün, nə günə qalmışıq ki, layiqli adamlar qala-qala, məşəlin daşınmasını İlhamə Quliyevaya həvalə ediblər. Məşəli Azərbaycanın adına şöhrət gətirən, bayrağımızı bütün yarışlarda qaldıran, o bayrağı fərəhlə çiyninə atıb gəzdirən, himni gözüyaşlı səsləndirən cavanlar aparılmalıdır. Nə olsun ki, sənətkaram. Bu yaşımda mənə yaraşmır və buna ixtiyarım yoxdur. Çünki bu məşəli daşımağa məndən əvvəl Azərbaycan bayrağını dünyada tanıdan, yüksəklərə qaldıran insanlar layiqdir”.
