“Bakıda hər il humanitar forumlarının keçirilməsi artıq ənənə halını alıb. Artıq dünya mətbuatı, xarici ölkələrin 
siyasi və elmi ictimaiyyəti bu forma çox diqqət etməyə başlayıb. Forum adından da göründüyü kimi, cəmiyyətin inkişaf məsələlərini, demokratiya, insan hüquqları məsələsini, təhsil, səhiyyə ümumən sosial problemlərlə bağlı məsələlərin müzakirəsinin çox ideal bir müstəvisinə çevrilib”.
Bunu millət vəkili Aydın Mirzəzadə IV Bakı Beynəlxalq Humanitar Forumunun işə başlamasını Aktual.az-a şərh edərkən deyib.
A. Mirzəzadə deyib ki, forumda müxtəlif ölkələrin siyasi qüvvələrini təmsil edən şəxslər fikir mübadiləsi edir və eyni zamanda bu və ya digər məsələlərdə digər üzvlərin təcrübəsindən də yararlanırlar: “Azərbaycan Prezidentinin bu forumlarda birbaşa iştirakı, orada etdiyi çıxışlar həmişə forumun əsas hadisəsinə çevrilir. Digər tərəfdən Azərbaycan rəsmiləri də bu forumlarda iştirak edərək Azərbaycanın humanitar inkişaf sahəsindəki təcrübəsini bölüşürlər. Onu da deyim ki, forum böyük diqqət tələb edir, ildən-ilə orada iştirak edənlərin sayı artır. Burada iştirak edənlərin statusları kifayət qədər yüksəkdir. Həm də hazırda yüksək dövlət vəzifəsində olanlar, eyni zamanda keçmiş yüksək vəzifə tutan şəxslərin iştirakı forumun nüfuzunu daim artırır.
Bu gün Rusiya Federal Məclisinin sədri Valentina Matvienko öz çıxışında maraqlı bir fikir bildirdi ki, Bakı Humanitar Forumu intellektual Davos Forumuna çevirilib. Hesab edirəm ki, bu əslində iştirakçıların foruma verdiyi böyük bir qiymətdir. Forum, sadəcə olaraq, Bakının yox, bütövlükdə Azərbaycanın ildən-ilə inkişafının göstəricisidir. Qonaqlar Azərbaycanda gedən quruculuq işlərini, infrastrukturun yenilənməsini, insan faktoruna dövlət tərəfindən verilən böyük bir diqqəti, demokratiya və insan hüquqlarının genişlənməsinin şahidi olurlar”.
İlqar Vəliyev/Aktual.az
