Bəlkə də bu məsələ məni çox yandırmazdı, əgər dünən Masazırdakı polis postunda 39 nömrə nişanlı avtobus geriyə – Sumqayıta qaytarılmasaydı. Bəlkə də yandırardı. Əmin deyiləm. Çünki 99 nömrə nişanlı avtomobilimin sürücüsü mən sumqayıtlı olduğuma görə polis serjantı tərəfindən geriyə dönmək əmri aldım. Halbuki mən Xırdalana bir müştərimlə görüşə gedirdim. 1 həftə əvvəlcədən təyin olunmuş vaxtda – saat 15.00-da orada olmalı idim (haşiyə: 99-ların buraxılmama əmri xəbərdarlıqsız 3 gün əvvəl tətbiq olunmağa başlayıb).
Lap heç Xırdalana deyil, rayona bilet almaq üçün gedən dostumu Bakı Avtovağzalına aparırdım. Ya da hansısa ticarət mərkəzində kondisionerlərə endirim başlayıb, kondisioner almağa gedirdim. Lap elə paltar almağa! (heç dəxli var?!) Öz avtomobilim ola-ola, mən nə üçün bu ağır yükləri daşımaq üçün bir də hansısa maşına əlavə pul verib gətirməliyəm?
Və ümumiyyətlə, bilən varmı, Sumqayıtdan, Saraydan, Masazırdan, Xırdalandan bir-birilərinə və Bakı avtovağzalına hansı ictimai nəqliyyat işləyir?
Bunlar bir yana, mənim kiçik biznesim var, işçilərim saat 18.00-da çıxıb gedir, mən sakitlikdə saat 21-dək işləməyi xoşlayıram. Yazı-pozu adamıyam – bir də gördün, ilham pərisi saat 22.00-da qəfildən qapıdan girdi! Saat 20.30-da Bakıdan Sumqayıta adı məşhur sürət qatarının sonuncu reysidir. Mən Sumqayıta nə ilə qayıdım – 20 Yanvar metrosu çıxışında dayanıb, 21 balı olması ilə fəxr edən, sürücülük vəsiqəsi olmayan 20 yaşlı jiquli sürücüləri iləmi?
Əlavə xərcə çevrilən bu vaxt itkilərini mənə – sadiq təbəəyə, Azərbaycan vətəndaşına kim ödəyəcək?!
Dövlət Yol Polisi sözçüsünün “Bu qaydalardan 1 nəfər narazıdırsa, 100 nəfər razıdır” fikri ilə razılaşıb, “Təki paytaxt sakinləri razı qalsın!” deyərdim… əgər 39 nömrə nişanlı avtobus Sumqayıta qaytarılmasaydı!
Çünki 39-u saxlamaq tək Sumqayıtın borcu deyil! 02, 14, 19, 64, 58, 41, 28, 32, 26, 19 tək yerdə qalan rayonların problemi deyil! Öz rayonları olmayan bu dövlət nişanlı avtomobillərin yükünü çəkmək rayon yollarının tək borcu deyil! Ağdam, Cəbrayıl, Füzuli, Xankəndi, Xocavənd, Kəlbəcər, Qubadlı, Laçın, Şuşanı paytaxta buraqmamaqlamı Azərbaycanın olduğunu xatirələrdən unutdurmur Dövlət Yol Polisi?!
Xatiriniz artıq olsun!
lent.az
