Gürcüstan Milli Kommunikasiya Komissiyası “Maqtikom” şirkətinin “Kavkasus onlayn”ın əməliyyat aktivlərini almasına icazə verib.

Axar.az xəbər verir ki, bu barədə informasiyanı Gürcüstan mətbuatı yayıb. “Maqtikom” “Kavkasus onlayn” şirkətinin yayım tranziti vəabonentlər üçün internetin pərakəndə satış xidmətlərini özündə cəmləyən bütün səhmlərini almaq istəyir. Komissiya artıq “Maqtikom” şirkətinin bu addımının bazarda rəqabətin yox olmasına səbəb olmayacağını açıqlayıb.

“Maqtikom”la bərabər “Silknet” şirkəti də “Kavkasus onlayn”ın aktivlərinin satın almağı planlaşdırsa da, son anda komisiyya onların sənədlərini qəbul etməyib. Buna əsas səbəb kimi “Silknet”in lazım olan sənədləri vaxtında komissiyaya təqdim etməməsi olub. Gürcü şirkətləri ilə yanaşı Rusiyanın “Vimpelkom” kompaniyası da bu şirkətlə maraqlanır. Yaxın günlərdə komissiyanın da onun sənədlərini təsdiq etməsi gözlənilir.

Qeyd edək ki, “Maqtikom” Gürcüstan-ABŞ şirkəti hesab edilir.

“Kavkasus onlayn” şirkəti Gürcüstanın internet tranzitinin 61%-nə nəzarət edir. O həmçinin Qara dənizin dibi ilə Gürcüstana Avropadan gələn 1200 kilometrlik internet xəttinin sahibidir. Məhz bu kabel vasitəsilə Ermənistanın 85%-i, Gürcüstanın 55%-i, Azərbaycanın isə 50%-i internetlə təmin edilir.