Qarabağdakı separatçı-terrorçu dəstənin “təhlükəsizlik şurasının katibi” Vitali Balasanyan Rusiya sülhməramlı kontingentinin komandirinə müraciət edib. Ermənistan mediasında yer alan xəbərə görə, Vitali Balasanyan general-mayor Andrey Volkovdan tələb edib ki, qondarma “DQR”in razılığı olmadan azərbaycanlı jurnalistlərin və digər ölkələrin media nümayəndələrinin sülhməramlı qüvvələrin məsuliyyət zonasına daxil olmasına icazə verilməsin.
Qeyd edək ki, Azərbaycan tərəfi Laçın rayonunun Zabux və Sus kəndlərində, Laçın şəhərində qanunsuz yaşayan ermənilərə həmin əraziləri boşaltmaq üçün avqustun 25-nə kimi vaxt verib.
Mövzu barədə Elchi.az-a danışan Azərbaycanın mərhum prezidenti Əbülfəz Elçibəyin köməkçisi olmuş politoloq Oqtay Qasımov bildirib ki, Balasanyan kimi şəxslərin bu cür bəyanatlarla çıxış etməsi daha çox təbliğat və informasiya xarakterli məsələdir:
“Məlumdur ki, Balasanyan Azərbaycan tərəfindən axtarışa verilmiş şəxsdir. Onlar əvvəl-axır Azərbaycan hüquq mühafizə sisteminin və məhkəməsinin qarşısında cavab verməli olacaqlar. Ona görə də təbliğat xarakteri daşıyan xəbərlərin təsirinə düşmək lazım deyil. Əlbəttə ki, Balasanyan Qarabağda qalmaqda olan ermənilərin təmsilçisi kimi çıxış edir. Onun verdiyi bəyanatın doğruluğu, ya da qanuna uyğun olmasından söhbət gedə bilməz”.
“Balasanyanın “tələb”inə Azərbaycan tərəfinin cavabı necə olmalıdır?” sualına gəlincə, O.Qasımov vurğulayıb ki, 44 günlük savaşdan bu günə qədər dövlətimiz təxribatlara və mövcud prosesi əngəlləməyə çalışanlara verdiyi cavabı Balasanyana da verəcək:
“Bizim işimiz ermənilərin bu cür açıqlamalarını informasiya təbliğatından kənarlaşdırmaq və yarımçıq qalan prosesləri davam etdirməkdir. Bunlar da Laçının Zabux və Sus yaşayış məntəqələrinin Azərbaycanın nəzarətinə keçməsi, sonra da Balasanyan kimilərin dəstəsində olan erməni silahlı birləşmələrinin ərazilərimizdən çıxarılmasıdır. Azərbaycan bu məsələdə kifayət qədər konkret və qəti mövqeyini ortaya qoyub və istədiyinə gec-tez nail olacaq. Erməni silahlı birləşmələri Qarabağdan çıxarıldıqdan sonra bu məsələlərə birdəfəlik son qoyulacaq. Bu baxımdan Balasanyan kimilərin veriyi bəyanat və açıqlamaların təsirinə düşməli deyilik”.
Yeganə
