Birləşmiş Millətlər Təşkilatının (BMT) baş katibi Antonio Quterreş, “Qlobal istiləşmə dövrü bitdi, qlobal qaynama dövrü gəldi” deyərək, ölkələri tədbir görmək üçün təcili hərəkətə keçməyə çağırıb.
BMT dünya ölkələrini qlobal istiləşməyə qarşı təcili tədbirlər görməyə çağırıb.
Elchi.az xəbər verir ki, Quterreş BMT-nin Nyu Yorkdakı mənzil-qərargahında keçirdiyi mətbuat konfransında iqlim dəyişikliyi ilə bağlı xəbərdarlıq edib.
İyul ayının bəşər tarixində indiyə qədər qeydə alınan ən isti ay olduğunu vurğulayan Quterreş, ” İqlim dəyişikliyi indi buradadır və bu, qorxuludur. Bu hələ başlanğıcdır. Qlobal istiləşmə dövrü bitdi, qlobal qaynama dövrü gəldi”,-deyib.
Quterreş qeyd edib ki, bütün planet üçün çox çətin və fəlakətli yay olub.
“Liderlər rəhbərlik etməlidirlər, daha bəhanələrə, başqalarının hərəkətə keçməsini gözləməyə ehtiyac yoxdur. Bunun üçün artıq vaxt yoxdur.” Quterreş, qlobal temperatur artımını 1,5 dərəcə Selsi ilə məhdudlaşdırmaq və ən pis iqlim dəyişikliyindən qaçmaq üçün təcili iqlim fəaliyyət planları ilə bir araya gəlməyin hələ də mümkün olduğunu söyləyib.
Quterreş xüsusilə qlobal tullantıların 80 faizinə cavabdeh olan G20 ölkələrinin “iqlim dəyişikliyi və ədalət” üçün addımlar atmalı olduğunu və hər bir ölkənin qalıq yanacaqdan bərpa olunan enerjiyə keçməli və milli emissiya azaltma hədəflərini yerinə yetirməli olduğunu vurğulayıb .
Antonio Quterres yerli hökumətləri, qurumları və özəl şirkətləri, eləcə də hökumətləri BMT standartlarına uyğun olaraq bərpa olunan enerjiyə keçid etməyə çağırıb.
“Biz hələ də daha pisini dayandıra bilərik”
Ekstremal hava hadisələrinin artıq “yeni normala” çevrildiyini xatırladan Quterreş bəyan edib ki, bütün ölkələr buna uyğunlaşmalı və vətəndaşlarını qızmar istidən, ölümcül daşqınlardan, yanğınlardan, tufanlardan və quraqlıqdan qorumalıdır.
Quterreş inkişaf etməkdə olan ölkələrə iqlim dəyişikliyi ilə bağlı yardımın vacibliyini vurğulayaraq əlavə etdi: “2027-ci ilə qədər dünyada hər bir insan erkən xəbərdarlıq sistemi ilə əhatə olunmalıdır və ölkələr beynəlxalq tədbirləri səfərbər etmək üçün bir sıra qlobal məqsədləri nəzərdən keçirməlidirlər.
İnkişaf etmiş ölkələrin inkişaf etməkdə olan ölkələrə hər il 100 milyard dollarlıq iqlim dəyişikliyi dəstəyi vədini tutmalı olduqlarını ifadə edən Quterreş, bu günə qədər yalnız Kanada və Almaniyanın bu mövzuda verdiyi vədləri yerinə yetirdiyini açıqlayıb.
İqlim dəyişikliyi ilə mübarizədə hökumət, vətəndaş cəmiyyəti, iş dünyası və bütün aktorların əməkdaşlığa ehtiyacı olduğunu vurğulayan Quterreş:
“İnsanların dağıntılarının sübutu hər yerdədir. Amma bu, ümidsizliyə deyil, hərəkətə təkan verməlidir. Biz hələ də daha pisi dayandıra bilərik.
Nuranə Məmmədova
