Birləşmiş Millətlər Təşkilatının (BMT) bəzi üzvləri BMT Təhlükəsizlik Şurasına çağırış edərək, BMT Təhlükəsizlik Şurasının (BMT TŞ) iqlim dəyişikliyinin yaratdığı münaqişə riski ilə mübarizə aparmaq öhdəliyi olduğunu bildiriblər.
Elchi.az xəbər verir ki, Birləşmiş Ərəb Əmirlikləri (BƏƏ), Albaniya, Qana, Malta, Mozambik və İsveçrədən olan nümayəndələr BMT-nin Nyu-Yorkdakı binasında bir araya gələrək mətbuata bəyanatlarla çıxış ediblər.
Burada çıxış edən BƏƏ-nin İqlim Dəyişikliyi və Ətraf Mühit Naziri “Mariam Almheiri” deyib: “İqlim dəyişikliyi, sülh və təhlükəsizlik arasında əlaqə danılmazdır”.
Resurs çatışmazlığı, əkinçilik qaydalarının dəyişdirilməsi, əsas infrastrukturların məhv edilməsi və insanların yerdəyişməsi kimi faktorların qarşıdurma və zorakılığa səbəb olduğuna diqqət çəkən Almheiri, iqlim dəyişikliyinin insanların həyatına, dolanışıq vasitələrinə və ekosistemlərə təsir edəcəyini qeyd edib.
Regional və qlobal sabitliyin də təsirlənəcəyinə işarə edən Almheiri, bir ölkənin və ya təşkilatın bunun öhdəsindən gələ bilməyəcəyini ifadə edərək, “Çoxtərəfli sistem bütün imkanlarından istifadə edərək hər vəziyyətə uyğun bir həll tapmalıdır”,-deyib.
İsveçrə Xarici İşlər Nazirliyinin dövlət katibi, səfir Livia Leu deyib: “BMT Təhlükəsizlik Şurası iqlim dəyişikliyi nəticəsində yaranacaq münaqişələrin risklərinə hazırlaşmaq və onları idarə etmək üçün üzərinə düşən məsuliyyəti yerinə yetirməlidir”.
Əvvəlcə məlumatların toplanması və təhlilinin aparılması lazım olduğunu ifadə edən Leu, BMT-nin iqlim dəyişikliyinin BMT-nin sülhməramlı əməliyyatlarına necə təsir edəcəyini araşdırmalı olduğunu qeyd edib.
Nuranə Məmmədova
