Böyük Britaniyanın Baş naziri Boris Conson Rusiyanın Ukraynaya hücum edəcəyi halda ölkəsinin Kiyevə necə dəstək verə biləcəyi barədə suala cavab verib.
Elchi.az-ın xəbərinə görə, bu barədə Britaniya Baş naziri Boris Conson NATO Baş katibi Yens Stoltenberqlə keçirdiyi mətbuat konfransında danışıb.
Baş nazir deyib ki, Britaniya tərəfindən ukraynalı hərbçilərə təlimlər keçirilib: “Biz bu ölkəyə daha nə təklif edə biləcəyimizi düşünəcəyik. Ukraynalılar yaxşı hazırlaşıblar, bizim təklif etdiyimiz elə şeylər var ki, əslində onların buna ehtiyacı yoxdur. Hazırda ayırdığımız paketin düzgün olduğunu düşünürük. Ancaq vurğulamaq istəyirəm ki, əgər belə bir vəziyyət yaranarsa, Ukrayna torpağında qan tökülərsə, bu, mütləq fəlakət olacaq”.
O qeyd edib ki, toqquşmanın ağır nəticələri barədə Kremllə yanaşı, rus xalqı da düşünməlidir: “Rusiya əsgərlərinin qanı bahasına, iqtisadi cəhətdən ağır nəticələrin olacağı bu fəlakət onlara lazımdır? Rusiya bunu düşünməlidir”.
