Rusiyanın Avropa sərhədlərindəki əsgərlərinin sayını artırmasına cavab olaraq NATO Baltikyanı ölkələrə əlavə qüvvə göndərir. Rusiya isə təkcə hərbçilərini deyil, Avropadakı hərbi təchizatını da gücləndirir.

“Mirror” qəzeti xəbər verir ki, Rusiyanın yeganə təyyarədaşıyan gəmisinin Pa-de-Kale boğazından keçməsindən 10 gün sonra Britaniyada müharibə müzakirələri başlayıb.

Ölkənin Müdafiə naziri Maykl Fallon parlamentdə çıxışında Rusiyaya qarşı görülən cavab tədbirlərindən danışıb. O, Kremldən gələn təcavüz təhlükəsinin mahiyyətini anladığını və Rusiyaya cavab vermək iqtidarında olduqlarını deyib:

“2017-ci ildə Britaniyanın Rusiya ilə savaşa başlayacağı barədə deyilənlər həqiqətə uyğun deyil. Rusiyanın aqressiyası 2015-ci ildə artıb, amma bu, hələ müharibə ilə nəticələnəcək həddə deyil. Uzaq məsafəli aviasiya, sualtı qayıqların fəaliyyəti, sularımızdan keçən təyyarə gəmisi, Rusiyanın Suriyada və başqa yerlərdə rolu və s. Mən bunun gələn il açıq münaqişənin baş verəcəyinə işarə olduğunu düşünmürəm”.

Britaniya ordusunun 2018, yaxud 2019-cu ildə Rusiya ilə müharibəyə hazır olub-olmamasıyla bağlı sualları cavablandırarkən nazir ordunun tam hazır vəziyyətdə olduğunu bildirib:

“Rusiya ilə savaş baş verərsə, Britaniya təkbaşına deyil, NATO-nun fəal üzvü kimi davranacaq, Alyansın ssenarisi üzrə hərəkət edəcək”.

Britaniyalı nazir ölkəsinin gələn il Estoniyaya 800 əsgər göndərəcəyini açıqlayıb.