Milli Şuranın 12 oktyabra planlaşdırdığı mitinqlə bağlı Müsavat Partiyasının rəhbərliyi ilə Milli Şuranın sədri Cəmil Həsənli arasında müzakirə aparılıb.
Bu barədə musavat.com-a daxil olan informasiyada deyilir ki, müzakirələrdə Müsavat üzvlərinin də mitinqdə iştirakının məqsədəuyğunluğu qərarına gəlinib.Xəbəri dəqiqləşdirmək üçün Cəmil Həsənli ilə əlaqə saxladıq.
Cəmil Həsənli bildirdi ki, hər kəsi 12 oktyabr mitinqinə dəvət edib: “Biz mitinqə hər hansı məhdudiyyət qoymuruq. Bu, Milli Şuranı müdafiə mitinqi deyil, hansısa bir siyasi partiyanı müdafiə mitinqi deyil. Bu, siyasi məhbusları müdafiə mitinqidir. Kim özünü bu prosesdə görmək istəyirsə, hamı dəvətlidir, buyursunlar, gəlsinlər. Azərbaycan cəmiyyətinin vicdan borcudur ki, gəlsin, siyasi məhbuslara öz dəstəyini ifadə eləsin. Ona görə də heç kimə heç bir məhdudiyyət yoxdur. Üstəgəl Müsavat Partiyası Leyla Yunusun və digər siyasi məhbusların müdafiə komitəsinin üzvüdür. Bu mitinq həm də Müdafiə Komitəsinin bir işidir. Biz məmnunuq ki, Müsavat Partiyası da bu mitinqdə iştirak eləmək istəyir”.
Müsavat Partiyasının funksioneri Gülağa Aslanlı isə bildirdi ki, Cəmil Həsənli ilə mitinq barəsində müəyyən söhbətləri olub: “Müsavat Partiyası da bu mitinqə dəvət olunduğunu qəbul edir və Müsavat rəhbərliyi məsələni müzakirə edəcək. Müsavat Məclisinin 11 oktyabrda keçiriləcək toplantısında 12 oktyabr mitinqi ilə bağlı qərar veriləcək”.
