Cənubi Koreya Birləşmiş Millətlər Təşkilatının Təhlükəsizlik Şurasının (UNSC) Şimali Koreyaya qarşı sanksiyalarını pozan fəaliyyətlərdə şübhəli bilinərək gəmini ələ keçirib.
Elchi.az Yonhap-a istinadən xəbər verir ki, Cənubi Koreya rəsmiləri Şimali Koreyadan yola düşən və Rusiyaya doğru hərəkət edən DEYI adlı yük gəmisini ölkənin cənub sahillərindən keçərkən dayanmağa çağırıb.
Bayraqsız 3000 tonluq gəmidəki insanlar çağırışı rədd edərək yoluna davam etdikdə Cənubi Koreya Sahil Mühafizəsi səlahiyyətliləri hərəkətə keçərək Yeosu şəhəri sahillərində gəmini ələ keçirib.
Səlahiyyətlilər Pusan limanına gətirilən gəmidə Çin və İndoneziya vətəndaşlarının da olduğu 13 nəfərlik ekipajın olduğunu açıqlayıb.
Cənubi Koreya Xarici İşlər Nazirliyinin rəsmisi gəmi ilə bağlı BMT Təhlükəsizlik Şurasının Şimali Koreyaya qarşı sanksiyalarını pozmaqda şübhəli bilinərək araşdırma aparıldığını açıqlayıb.
Rəsmi məsələ ilə bağlı ABŞ ilə sıx əlaqə saxladıqlarını bildirib.
Digər tərəfdən, ekipaj yük anbarını açmaqdan imtina etdiyi üçün gəminin nə daşıdığı hələlik təsdiqlənməyib.
Şayəstə Hüseynova
