Cənubi Koreyanın “Hyundai Engineering-Construction” şirkəti və Səudiyyə Ərəbistanının “Saudi Aramco” neft şirkəti Əl-Cəfurə qaz yatağında qaz emalı qurğusunun tikintisi üçün 2,4 milyard dollarlıq müqavilə imzalayıb.
Elchi.az xəbər verir ki, Yonhap-ın xəbərinə görə, Cənubi Koreya Prezident Aparatının bəyanatına əsaslanaraq, Cənubi Koreya şirkətləri son razılaşma ilə Səudiyyə Ərəbistanında 2023-cü ildə həyata keçirilən tikinti layihələrinin ümumi dəyərini 8,6 milyard dollara yüksəldib.
Mərasimdən sonra çıxış edən Yoon texnoloji dəyişikliklərə və dövrün tələblərinə uyğun olaraq iki ölkənin infrastruktur və iqtisadi əməkdaşlığı dərinləşdirməli olduğunu bildirib.
Bundan əlavə, Cənubi Koreyanın internet portal operatoru Naver, Ər-Riyad və Məkkə də daxil olmaqla, 5 şəhərdə şəhərsalma, idarəetmə xidmətləri və daşqınların proqnozlaşdırılması xidmətlərinin göstərilməsi üçün Səudiyyə Ərəbistanının Bələdiyyə, Kənd İşləri və Mənzil Təsərrüfatı Nazirliyi ilə 100 milyon dollarlıq müqavilə imzalayıb.
Cənubi Koreya prezidenti Yoon və Səudiyyə Ərəbistanının vəliəhd şahzadəsi Məhəmməd bin Salman 2022-ci ilin noyabrında iki ölkə arasında əməkdaşlığı gücləndirəcək layihələr üzrə komitə yaratmaq barədə razılığa gəliblər.
Yoonun Səudiyyə Ərəbistanına oktyabrın 21-də başlayan 4 günlük səfərindən sonra Qətərə gedəcəyi gözlənilir.
Nuranə Məmmədova
