“Ülkər” filminin çəkilişlərində gözlənilməz və təhlükəli vəziyyət yaranıb. Belə ki, çəkilişlərdə istifadə edilən canavar filmdə rol alan aktrisa Röya Paşayevaya hücum edib.
Elchi.az xəbər verir ki, bu haqda filmin layihə rəhbəri və prodüsseri Faiq Nağıyev Moderator.az-a açıqlamasında deyib.
“Ülkər” bədii filminin ssenari müəllifi Yeganə Kərimzadədir. O bizə Fərman Kərimzadənin yadigarıdır. Film həyatda baş vermiş real hadisələr əsasında lentə alınıb. Layihə rəhbəri və baş prodüsseri mənəm, quruluşçu rejissoru Xəyalə Meydanovadır. Aktyorlarla işləyən əməkdar artist Rövşən Kərimduxtdur. Filmdə Rövşən Kərimduxt, İlham Əsədov, Məhbubə Mirpaşaqızı, Tahir İsmayılov, Mahir Mirişli, Mətləb Abdullayev və s. sənətçilər çəkilib. Bu filmdə ilk dəfə olaraq vəhşi canavarla aktrisa yarım metrdən az olan məsafədə üz-üzə qaldılar. Çox maraqlı bir sujet xətti var. Dram-tragediya janrındadır. Çəkiliş vaxtı canavar az qaldı aktrisanı parçalasın. Əslində canavar əhliləşdirilmişdi və insanlar arasında olduğundan onlara hücum etməməli idi. Səs-küy, qışqır-bağır salandan sonra canavar qaçdı. Qaçıb Xızının meşələrinə girdi. 2 gün keçəndən sonra kənd sakinləri həmin canavarı telefonla çəkib videonu bizə göndərmişdilər. Bu da sosial şəbəkələrdə marağa səbəb olmuşdu”, – Faiq Nağıyev bildirib.
Hücuma məruz qalan Röya Paşayeva da canavarın hücumu zamanı qorxduğunu deyib:
“Filmin çəkilişləri çox maraqlı keçdi. Ən maraqlı və yaddaqalan o idi ki, mən ayaqyalın, əl tutmağa belə çətinlik çəkdiyim sıldırım qayaya qalxmalı oldum. Gərgin çəkilişdən sonra o dağa qalxmaq çox ağır idi. Mənim heç bir təhlükəsiz kəmərim yox idi. Çünki çəkiliş dronla aparılırdı. Mən çətinliklə də olsa qayalığın tam zirvəsinə qalxdım. Amma əsl sürpriz zirvədə, qayanın lap başında məni gözləyən canavar idi. Mən həyatda canlı canavar görməmişdim, o ki, qalsın yaxın məsafədən onunla göz-gözə dayanım. Canavar mənə hücum etmək istəyəndə bir anlıq geriyə çönüb baxdım və sıldırım qayanın zirvəsində olduğumu gördüm. Əlbəttə ki, çox qorxdum. Qışqırıq səsləri canavarı hürkütdü”.
