Çin prezidenti Si Cinpinq ABŞ-ın keçmiş dövlət katibi Henri Kissincerlə görüşü zamanı deyib: “Biz köhnə dostlarımızı heç vaxt unutmuruq.
Elchi.az xəbər verir ki, ABŞ-ın keçmiş dövlət katibi Henri Kissincer Çinin paytaxtı Pekinə səfəri çərçivəsində bu ölkənin sədri Si Cinpinqlə görüşüb.
Görüş zamanı Çin xalqının dostluğa önəm verdiyini qeyd edən Si Cinpinq, “Biz nə köhnə dostlarımızı, nə də Çin-ABŞ münasibətlərinin və iki xalq arasında dostluğun inkişafına verdiyiniz tarixi töhfələri heç vaxt unutmayacağıq” ,-deyib.
Çinin ABŞ-la münasibətlərini davamlı şəkildə inkişaf etdirmək üçün düzgün yolu tapmağa hazır olduğunu qeyd edən Si Cinpinq bunun hər iki tərəfə və dünyaya fayda verəcəyini bildirib. Si Cinpinq ümid etdiyini bildirib ki, Kissincer və digər uzaqgörən amerikalılar Çin-ABŞ münasibətlərinin bərpasında konstruktiv rol oynamağa davam edəcəklər.
ABŞ diplomatı Kissincer vurğulayıb ki, ABŞ və Çin arasında münasibətlər dünyada sülh və rifahın təmin olunması üçün lazımdır. Şanxay Bəyannaməsində yer alan prinsiplərin indiki şərtlər daxilində tətbiq edilməli olduğunu deyən Kissincer, tək Çin prinsipinə hörmətlə yanaşmanın vacibliyini vurğulayıb. Kissincer Birləşmiş Ştatlar və Çin xalqları arasında barışıq üçün səylərini davam etdirməyə sadiq olduğunu bir daha bəyan edib.
Nuranə Məmmədova
