Çin və Ərəb Liqası ölkələri İsrailin hücumu altında olan Qəzzaya qarşı atəşkəsə çağırıb. Tərəflərin verdiyi bəyanatda mülki şəxslərə qarşı hər cür zorakılığa son qoyulmalı olduğu bildirilib.
Elchi.az xəbər verir ki, Çin Xarici İşlər Nazirliyindən verilən açıqlamaya görə, nazir Vanq Yi Misirə səfəri çərçivəsində Ərəb Liqasının baş katibi Əhməd Əbu Qeyt ilə görüşüb.
Görüşdən sonra yaydıqları birgə bəyanatda tərəflər İsrailin hücumları altında olan Qəzzada dərhal və hərtərəfli atəşkəsin zəruriliyini vurğuladılar.
Bəyanatda tərəflər Qəzzadakı vəziyyət və Fələstin məsələsi ilə bağlı Birləşmiş Millətlər Təşkilatının Təhlükəsizlik Şurası və Baş Assambleyasının qərarlarının yerinə yetirilməsi, mülki şəxslərə qarşı hər cür zorakılıq və beynəlxalq və humanitar hüququ pozan hərəkətlərə son qoyulmasının vacibliyinə diqqət çəkib.
Çin və Ərəb Liqası ölkələri fələstinli mülki şəxslərin məcburi köçkünlüyünə qarşı olduqlarını vurğuladılar və bütün əsirlərin dərhal azad edilməsini, humanitar yardımın koordinasiyası mexanizminin yaradılmasını və onlara sürətli, təhlükəsiz, davamlı və maneəsiz humanitar çıxışın təmin edilməsini tələb etdilər.
Tərəflər həmçinin Qırmızı dənizdə gərginliyin artması ilə bağlı narahatlıqlarını ifadə edərək, beynəlxalq ticarət yollarının təhlükəsizliyi təmin edilərkən Yəmənin suverenliyi və ərazi bütövlüyünə hörmət edilməli olduğuna işarə ediblər.
Nuranə Məmmədova
