NATO bu gün “bütün bəlaların mənbəyidir” və harada görünsə də, “çirkli iz” buraxır.
Elchi.az TASS-a istinadən xəbər verir ki, bu barədə Çin Xalq Respublikasının BMT- dəki daimi nümayəndəsi Çjan Szyun bildirib.
Agentlik xatırladır ki, iyulun 11-də Vilnüsdə baş tutan NATO sammiti iştirakçılarının yekun bəyanatında alyans ölkələrinin narahatlığı Çinin nüvə arsenalının artırılması ilə vurğulanıb. Qərb hesab edir ki, Pekin nüvə silahlarına nəzarət etmək üçün kifayət qədər səy göstərmir. Sənəddə qeyd edildiyi kimi, Rusiya ilə Çin arasında strateji tərəfdaşlığın dərinləşməsi həm də NATO-nun maraq və dəyərlərinə ziddir.
Çjan Szyun ÇXR-ə qarşı bütün ittihamları rədd edib və bildirib ki, NATO özünü müdafiə alyansı adlandırır, lakin eyni zamanda öz üzvlərini hərbi xərcləri artırmağa və “dünyada hərbi fəaliyyətlər həyata keçirməyə” təşviq edir. O, Şimali Atlantika Alyansını başqa dövlətlərin daxili işlərinə qarışmaqda, müharibəni qızışdırmaqda, bomba atmaqda və dinc sakinləri öldürməkdə ittiham edib.
“Saysız-hesabsız faktlar göstərir ki, NATO bütün bəlaların əsl mənbəyidir”, – deyə Çjan bildirib.
O, həmçinin vurğulayıb ki, bəzi NATO ölkələri “ikili standartlar həyata keçirir, digər dövlətlərin ərazisinə silah yerləşdirir və regional gərginliyi gücləndirir”.
Nuranə Məmmədova
