Cənubi Koreya polisi iki yeni doğulmuş körpəsini öldürməkdə və cəsədlərini illərlə dondurucuda saxlamaqda ittiham olunan qadının həbsinə order verilməsini istəyib.
Elchi.az Haber Global-a istinadən xəbər verir ki, “Gyeonggi Nambu” əyalət polisinin rəsmisi “CNN International”-a bildirib ki, 30 yaşlarında olan qadın 12, 10 və 8 yaşlı digər üç uşağına baxarkən maddi çətinliklərlə üzləşdiyi üçün körpələri öldürdüyünü etiraf edib.
Yeni doğulan körpələr öləndə cəmi bir günlük olub.
İlk qurban qadının 2018-ci ilin noyabrında xəstəxanada doğulan dördüncü övladı olub.
Polis bildirib ki, qadın doğuşdan bir gün sonra qızı boğub və cəsədini dondurucuya qoyub.
Şübhəli 2019-cu ilin noyabrında doğulan beşinci övladına da eyni şeyi etməkdə ittiham edilib.
İş may ayında, hökumətin təftiş komissiyası xəstəxanada doğuşların qeydə alındığı halda, körpələrin heç vaxt rəsmi qeydiyyata alınmadığını müəyyən etdikdən sonra ortaya çıxıb.
Qadın bu gün həbs qərarı ilə bağlı məhkəmə iclasında iştirak edəcək.
Nuranə Məmmədova
