Dünyanın ən yaşlı adamı olan Venesuelalı Xuan Vinsent Peres Mora 115 yaşında vəfat edib. Bu barədə ölkə prezidenti Nikolas Maduro məlumat verib.
Elchi.az Bloomberg.com-a istinadən bildirir ki, bu barədə ölkə prezidenti Nikolas Maduro məlumat verib.
“Xuan Vinsent Peres Mora dünyanın ən yaşlı adamı kimi Ginnesin Rekordlar Kitabına düşüb, o, 115 yaşında dünyasını dəyişib. Mən onun ailəsini qucaqlayır və El Kobre şəhərinin (uzunömürlü şəxsin doğulduğu yer) bütün sakinlərinə başsağlığı verirəm”, – deyə Maduro “X”-də yazıb.
“El Nacional” qəzetinin məlumatına görə, Xuan Vinsent Peres Mora 114 il 339 gün yaşadıqdan sonra tənəffüs yollarında yaranan ağırlaşmalar səbəbindən dünyasını dəyişib. 2022 fevralın 4-də o, 112 yaşında vəfat edən ispaniyalı Saturnino de la Fuente Qarsiyanı qabaqlayaraq, 112 yaş 253 günlə dünyanın ən yaşlı adamı kimi Ginnesin Rekordlar Kitabına düşüb. Xuan Vinsent Peres Mora uzunömürlülüyünü daimi iş, tam istirahət, erkən yatmaq və gündə bir stəkan brendi içmək ilə izah edib.
Xuan Vinsent Peres Mora 1909-cu ildə anadan olub. Onun 11 övladı olub. Qəzet qeyd edib ki, bu yaxınlarda o, San Xose-de-Bolivardakı evinin fermasında yaşayırmış.
Yeganə
