Avtomobil qəzalarında ölən və xəsarət alan şəxslərin sayı ötən illərlə müqayisədə azalıb.
Elchi.az xəbər verir ki, bunu Daxili İşlər Nazirliyinin Baş Dövlət Yol Polisi İdarəsinin əməkdaşı, polis mayoru İkram Məmmədov deyib. O bildirib ki, ötən 3 ilə yaxın müddətdə avtomobil qəzalarının qarşısının alınması və ağırlıq dərəcəsinin aşağı salınması sahəsində dayanıqlı müsbət təmayül qeydə alınıb: “Statistikaya əsasən dövlət müstəqilliyindən əvvəlki dövrdə il ərzində yol-nəqliyyat hadisələrində orta hesabla 1300-dək şəxs həlak olur, 4 minə yaxın insan xəsarət alırdı. Həmin vaxtdan ötən müddətdə avtomobillərin sayı 4 dəfə (387665 – dən 1.620.910 – a qədər) artsa da, qəzalarda ölənlərin (557) sayı 2 dəfə, xəsarət alanların sayı (2250) təxminən 2,5 dəfə azalıb”.
Polis mayoru qeyd edib ki, Avropa Komissiyasının hesablamalarına əsasən, Azərbaycanda əhalinin hər 100 min nəfərinə nisbətdə yol-nəqliyyat hadisələrində həlak olanların sayına görə respublikamız dünyada 28-ci yerdədir.
