“Elm və Təhsil Nazirliyi yeni işə qəbul edilən müəllimlərin 5 il müddətində sertifikatlaşdırmadan azad edilməsini və onların 60 ballıq sistemlə topladığı balların sertifikatlaşdırmada tətbiq edilən 100 ballıq sistemlə uyğun olmamasını əsas gətirib onlara əmək haqlarına əlavələrin verilməsi üçün 2 metoddan birinin tətbiq ediləcəyini deyir: Onlar ya sertifikatlaşdırmaya buraxılacaq, ya da onların balı 100 ballıq sistemə uyğunlaşdırılıb sertifikatlaşdırma balı hesab ediləcək”.
Elchi.az xəbər verir ki, bu barədə təhsil üzrə ekspert Kamran Əsədov məlumat verib.
Onun sözlərinə görə, müsabiqə ilə yeni işə qəbul edilən bir şəxsin vəzifəyə uyğun olub-olmadığını belə tezliklə yoxlamaq absurd, 60 ballıq sistemin 100 ballıq sistemə uyğunlaşdırılması isə məntiqi deyil:
“Lakin bu problemin çox rahat bir həlli yolu var: Onsuz da sertifikatlaşma və əmək haqlarına əlavələrin verilməsi prosesi bundan sonrakı 5 il ərzində yekunlaşacaq. Bu il 100 ballıq sistemlə işə qəbul edilən müəllimlərin topladığı ballar sertifikatlaşmada topladığı bal hesab edilsin və onların həmkarlarına əmək haqlarına əlavələr verildiyi bölgələrdə onlara da bu məbləğlər ödənilsin. Lakin 60 ballıq sistemlə işə yeni qəbul edilən müəllimlərə bu məbləğlər 5 illik stajları tamam olduqdan sonra, yəni sertifikatlaşmaya buraxılandan sonra ödənilsin. Belə baxanda onsuz da 5 ildən çox stajı olan müəllimlərin sertifikatlaşma prosesi 5 il ərzində tamamlanacağı səbəbi ilə onların da hamısına bu əlavə eyni zamanda ödənilməyəcək.
Ancaq burada bir problem 100 ballıq şkala ilə işə qəbul edilənlər arasında keçid balının 40 bal müəyyən edilməsi səbəbindən 40-50 bal toplayan müəllimlərin mövcud olması ehtimalıdır. Düzdür ki, belələrinə 10 faizik əlavə belə ödənilməyə bilər. Lakin 49 bala qədər toplayan müəllimi sertifikatlaşma nəticəsində işdən çıxarıb, yerinə 40-49 bal toplayanı işə qəbul etmək qaydası kimin ağlına gəlibsə o əsil menecerdir”.
Şayəstə
