Yanvarın 7-də bir dəstə başçısının həbsxanadan “itməsi” və mütəşəkkil cinayət qrupları arasında qarşıdurmalarla başlayan Ekvadorda 60 günlük fövqəladə vəziyyət davam edərkən, polis və ordudan ibarət təhlükəsizlik qüvvələri həbsxanalarda əməliyyatlar həyata keçirib.
Elchi.az xəbər verir ki, Ekvadorda cinayətkar dəstənin lideri Adolfo Macias Villamar ‘Fito’ yanvarın 7-də həbsxanadan yoxa çıxıb, dəstə üzvləri canlı yayım zamanı milli kanala basqın etdilər və prezident Daniel Noboa gecə komendant saatı da daxil olmaqla 60 günlük fövqəladə vəziyyət elan edib.
Ordu ölkədə asayişi bərpa etmək üçün polislə birgə əməliyyatlara başladıqdan sonra mütəşəkkil cinayətkar dəstələrə qarşı mübarizə aparan prokuror Sezar Suares Quayakil şəhərində güllələnərək öldürülüb.
Ekvador təhlükəsizlik qüvvələri həftə ərzində ölkənin müxtəlif həbsxanalarında geniş miqyaslı əməliyyatlar keçirdiklərini və həbsxanalara nəzarəti ələ keçirdiklərini açıqlayıb. Əməliyyat görüntülərində ordu və polisin əməliyyatdan sonra həbsxanalarda dövlət bayrağı qaldırdığı, yüzlərlə məhkumun həyətə toplaşaraq dövlət himnini oxuduğu görülüb.
Ekvador prezidenti Noboa, “Ölkədəki həbsxanaları nəzarət altına alırıq” deyib.
Bildirilib ki, 9-18 yanvar tarixləri arasında ölkə daxilində 61 əməliyyatda 23 min 610 təhlükəsizlik qüvvəsi iştirak edib və 158-i terrorçu olmaqla, ümumilikdə 2 min 174 nəfər saxlanılıb.
Şayəstə Hüseynova
