“Elnurun yenidən Azərbaycanı Avrovisizon yarışmasında təmsil etməsi real ola bilməz”
“O səs Türkiyə” yarışmasının qalibi Elnurun Azərbaycanı yenidən Eurovision mahnı yarışmasında təmsil edəcəyi barədə Türkiyə mətbuatında məlumatlar yayıldı.
“Yeni Müsavat”ın əməkdaşı xəbərin doğruluğunu öyrənməyə çalışıb. Uzun müddət Elnurla birgə çalışan əməkdar artist, bəstəkar Gövhər Həsənzadə yayılan məlumata inanmadığını bildirib:
“Mən də hamı kimi bununla bağlı xəbəri mətbuatdan izlədim. Şəxsən öz fikrimi bildirirəm ki, Elnura yenidən Azərbaycanı Eurovision yarışmasında təmsil edilməsi ilə bağlı təklifin olmasına real baxa bilmirəm. Amma bilmək olmaz, bəlkə də doğrudur. Lakin bir neçə gün bundan əvvəl mənimlə əlaqə saxlayanda bu barədə heç nə demədi. Əgər planında belə bir məsələ olsaydı mütləq fikirlərini mənimlə bölüşərdi. Mənə yalnız yeni albom buraxacağını dedi”.
Bəstəkar Elnurun səhhətində ciddi problem yarandığını deyib:
“Bu aralar bərk xəstələnib. Xəstələyinə səbəb soyuqdəymədir. Buna görə ciddi müalicə almaq məcburiyyətində qalıb. Səhhəti yaxşılaşan kimi planları haqda mənə danışacağını bildirdi”.
Məsələ ilə əlaqədar Azərbaycan Respublikası Gənclər və İdman Nazirliyi ilə əlaqə saxlamağa çalışsaq da nazirliyin mətbuat xidmətindən zənglərimizə cavab verən olmadı.
Qeyd edək ki, bu günlərdə Türkiyə mediası Elnurla bağlı maraqlı xəbər yayıb. Məlumata görə Elnur Hüseynov tamaşaçılardan 1 milyon səs toplayaraq, yarışmanın 4 illik tarixində yeni rekorda imza atıb. Bu qələbədən sonra Azərbaycanın səlahiyyətli şəxsləri “O Səs Türkiyə”dəki uğuru ilə diqqət çəkən Elnur Hüseynovu 2015-ci ilin may ayında keçiriləcək Avrovision mahnı müsabiqəsinə göndərmək qərarına gəliblər.
