Hazırda Gürcüstan hökuməti təbii qazın tədarükündə şərtlərin pisləşəcəyini gözləmir və ümid edir ki, sabit qiymətlə ölkəni “mavi yanacaq”la təmin edə biləcək.
Elchi.az-ın Gürcüstan mətbuatına istinadən verdiyi məlumata görə, bu barədə Gürcüstanın Baş nazirinin müavini, iqtisadiyyat və davamlı inkişaf naziri Levan Davitaşvili bildirib.
“Biz bu gün şərtlərimizin pisləşəcəyini gözləmirik və uzunmüddətli perspektivdə tərəfdaşlarla əməkdaşlığımızı davam etdirməyə ümid edirik. Çünki Gürcüstan təchizatçı ölkəyə – Azərbaycana hörmət edir və vəziyyət əksinə dəyişsə belə, biz daha uzunmüddətli, sabit müqavilələrə sadiq qalacağıq”, – L. Davitaşvili qeyd edib.
O vurğulayıb ki, Azərbaycanla əməkdaşlıq bir ilə əsaslanmır, bu, uzunmüddətli, strateji bir əməkdaşlıq formasıdır.
“Düşünürük ki, dost ölkələrlə düzgün, dərin və yaxşı ünsiyyət-koordinasiya ilə bu əsas enerji təchizatçısından tədarükü təmin edə biləcəyik”, – L. Davitaşvili vurğulayıb.
