Azərbaycanlı iş adamı Hafiz Məmmədovun İngiltərə “Şeffild Uensdey”i ilə imzaladığı müqavilə qüvvədən düşüb. Lent.az-ın sportnet.az-a istinadən verdiyi məlumata görə, bu barədə klub prezidenti Milan Mandariç açıqlama verib.O deyib ki, Məmmədovun “Şeffild Uensdey”ə sahibliyi barədə iyunun 10-da bağladıqları anlaşmanı səhmdarın lazımi məbləğdə vəsaiti ödəyə bilməməsi üzündən həyata keçirə bilməyiblər: “Mən hələ də ümidvaram ki, o, Azərbaycandakı problemlərini yoluna qoyacaq. Amma söz-söhbətlərin davam etməsinə imkan vermərəm”.
Mandariç yeni səhmdarın axtarışı istiqamətində fəaliyyət göstərəcəklərini bildirib.
Qeyd edək ki, son zamanlar Hafiz Məmmədovun biznes strukturlarında yaranan problemlər üzündən ona məxsus klublar – “Bakı” və Fransa “Lans”ı da maliyyə çətinlikləri ilə üzləşiblər.
