“Neftin qiymətinin düşməsinə ancaq əbləhlər sevinə bilər. Çünki, qiymət düşdükcə, yüzlərlə sosial layihələr dayanır, maaşlar azalır və hökumət daha da sərtləşir. Sərtləşdikcə də bir zərbə məmura dəyəndə, ikisi də xalqa dəyir”.
Bunu neftin dünya bazarında qiymətinin kəskin ucuzlaşmasına münasibət bildirən Azərvaycan Xalq Cəbhəsi Partiyasının sədri Razi Nurullayev deyib. Sədr qeyd edib ki, bu gün artıq bir çox özü ayaq üstə durmağı bacaran kiçik və böyük şirkətlər fəaliyyətini dondurub:
“Neftin qiymətdən düşməsinə sevinmirəm və bunu ölkəmiz üçün fəlakət hesab edirəm. Baxın, görün nə qədər özü ayaq üstə durmağı bacaran kiçik və böyük şirkətlər fəaliyyətini dondurub. Minlərlə kiçik podratçı və sub-podratçılar da evinə çörək apara bilmir. Buna görə sevinmirəm. Amma, sevinənlər var. Elə başa düşürlər ki, neft qiymətdən düşdükcə, onların hakimiyyətə gəlmək şansları artır. Nə Əli Kərimli, nə də Milli Şura və nə də onlar kimi düşünən digərləri heç bir zaman hakimiyyətə yiyələnə bilməzlər. Təfəkkür sıfırdır, sıfır olaraq da qalacaq. Neft zaman-zaman qalxıb və enib. Amma, məhz, bu qalxma və enmə nəticəsində hakimiyyət dəyişikliyi görməmişəm.
İraqda neft var. Amma, İraq hakimiyyəti neftin ucuzlaşmasının yox, rəhbəriyin özünə vurğunluğunun qurbanı oldu. Səddam Hüseyn böyük danışdı, böyük iddialar irəli sürdü və sonda isə yanlış qərar verib böyük güclərlə döyüşməyə qalxdı.
Venesuelanın nefti var. Amma, onilliklərlə Hüqo Çavesi yıxmaq istəsələr də o yıxılmadı və xalqının sevimlisi olaraq qalırdı. Onu hakimiyyətdən xəstəlik apardı. Bu gün isə onun siyasətini Maduro aparır. Nə Liviya, nə İran, nə də digər neftlə bol olan ölkələr neftin və ya qazın ucuzlaşması nəticəsində hakimiyyət itirməyib”.
R. Nurullayev qeyd edib ki, neftin və qazın ucuzlaşması, həmçinin ölkəyə tətbiq edilən sanksiyalar fonunda hakimiyyət dəyişikliyi, demokratik, azad və şəffaf seçki keçirən ölkələrdə mümkün ola bilər:
“1979-cu ildən İrana qarşı sanksiyalar tətbiq edilib. Neft bu illər ərzində qalxıb bə enib, əlavə olaraq İran sanksiyalar üzündən neftini sata da bilməyib. Nə baş verib? O nəinki yıxılmayıb, hətta Qərbin başını o qədər qatıb ki, onlar milyardlar xərcləyiblər ki, elə özlərinin hakimiyyətə gətirdiyi İran mollalarının rejimini yıxsınlar. Amma, yıxa bilmədilər.
Liviya diktatoru Müəmmar Kaddafini ucuz neft yıxmadı. Amma, o yıxılana qədər 40 ildən çox hakimiyyətdə qaldı. Bu gün isə Liviya xalqı yenə də azad və firavan deyil. Müammar üçün burunun ucu göynəyir. Çünki, yıxdığı rejim qurduğu rejimdən daha mütərəqqi idi.
Neftin və qazın ucuzlaşması fonunda hakimiyyət dəyişikliyi, demokratik, azad və şəffaf seçki keçirən ölkələrdə mümkün ola bilər. Amma, Azərbaycanda neftin ucuzlaşması hakimiyyət dəyişikliyinə gətirə bilməz. Əksinə, hakimiyyəti müxalifətə qarşı daha qəddar olmağa və onun bütün imkanlarını məhdudlaşdırmağa sövq edəcək. Bunamı sevinirsiniz?”
AXCP sədri sonda, “Boğulan saman çöpündən yapışan kimi, indi də başınızın altına ucuz neftlə doldurulmuş yastıq qoyursunuz” deyə bildirib.
