Hindistanda qatarın toqquşması nəticəsində ölənlərin sayı 207 nəfərə çatıb.
Hindistanın Orissa əyalətində dünən baş verən qatar qəzasında ölənlərin sayı 207-yə yüksəlib, qəza nəticəsində 900-dən çox insan yaralanıb.
Elchi.az xəbər verir ki, The Hindu qəzetinin xəbərinə görə, dünən yerli vaxtla saat 19:20-də əyalətin Balasore bölgəsində, Bahanaga Bazar Qatar Stansiyasının yaxınlığında 3 qatarın iştirakı ilə baş verən qəzada 207 nəfər həyatını itirib, 900-dən çox insan yaralanıb. Onlardan 2-si sərnişin, 1-i isə yük olub.
Dəmir yolu rəsmisi qəzaya uğrayan sərnişin qatarlarının Coromandel Express və Yashwatpur-Howrah Express şirkətlərinə aid olduğu barədə məlumat paylaşıb.
Rəsmilər yaralılardan 179-nun xəstəxanaya yerləşdirildiyini, qatarda sıxışan 600-dən çox sərnişinin çıxarılması üçün işlərin davam etdiyini bildirib.
Orissa əyalətinin yüksək səviyyəli rəsmisi Pradeep Jena, bölgəyə 75 təcili yardım maşını və 500-dən çox polis və xilasetmə qrupunun göndərildiyini söylədi.
Xilasetmə işlərinə yerli əhalinin də dəstək verdiyi bildirilib. Qəzadan sonra 34 qatarın hərəkəti dayandırılıb.
Hindistan Prezidenti Droupadi Murmu Tvitter hesabında “bədbəxt qəza”dan dərin kədərləndiyini və yaxınlarını itirən ailələrin kədərini bölüşdüyünü bildirib.
Hindistanın baş naziri Narendra Modi isə tvitində qəza ilə bağlı Dəmiryolları naziri ilə görüşdüyünü və qəzadan zərər çəkənlərə bütün lazımi dəstəyin verildiyini bildirib.
Yaxınlarını itirən ailələrə gedən Modi yaralılara şəfa diləyib.
Nuranə Məmmədova
