PSJ-nin futbolçusu Zlatan İbrahimoviç yenə diqqət mərkəzinə düşüb.
Forvard Fransa Liqa-1-in 23-cü turunun “Renn”lə matçından sonra (1:0) miks zonada jurnalistlərdən biri ilə maraqlı dialoqa girib.
Jurnalistin Edinson Kavani ilə münasibətləri ilə bağlı ünvanladığı sual İbranın xoşuna gəlməyib. O, özünə uyğun tərzdə həmkarımızla mübahisə edib.
Jurnalist: – Çoxu sizi Edinson Kavani ilə yola getmədiyinizi yazır…
İbrahimoviç: – İnsanlar, yoxsa siz?
Jurnalist: – Jurnalistlər.
İbrahimoviç: – İnsanlar, yoxsa siz?
Jurnalist: – İnsanlardan eşitmişəm. Həqiqətən də Edinsonla münasibətiniz yaxşı deyil?
İbrahimoviç: – Deyəsən, siz bunu məndən yaxşı bilirsiniz…
Jurnalist: – Yox, mən bilmirəm.
İbrahimoviç: – Bəs bilmədiyiniz şeyi necə yazırsınız?
Jurnalist: – Mən sizdən cavab gözləyirəm…
İbrahimoviç: – Siz hələ də bu barədə danışırsınız? Mən hardan bilim?
Jurnalist: – PSJ-yə gələndən çox sayda qollar vurursunuz. Amma Kavani meydana daxil olandan sonra nədənsə ondan ötürmə istəmirsiniz.
İbrahimoviç: – Siz futbolu məndən yaxşı bilirsiniz?
Jurnalist: – Yox.
İbrahimoviç: – O zaman niyə bu barədə danışırsınız?
Jurnalist: – Bu, mənim işimdir. Bunu sizdən soruşmalıyam.
İbrahimoviç: – Siz jurnalistsiz, yoxsa operator?
Jurnalist: – Jurnalistəm.
İbrahimoviç: Bəs niyə kamera ilə çəkə-çəkə danışırsınız? Axı sizin operatorunuz olmalıdır.
Jurnalist: – Rəhbərlik belə istəyir.
İbrahimoviç: – Deməli, maddi vəziyyətiniz yaxşı deyil.
Jurnalist: – Bəli.
İbrahimoviç daha sonra Kavani ilə arasında heç bir problemin olmadığını bildirib.
“Renn”lə oyunun gedişində İbra baş hakimə qarşı hörmətsizlik etmişdi. İsveç millisinin üzvü referinin yanına gəlməsi ilə bağlı tələbinə məhəl qoymamışdı. Çıxılmaz vəziyyətdə qalan hakim özü İbraya yaxınlaşaraq ona şifahi xəbərdarlıq etmişdi.
